Ram Charan: రంగం ఏదైనా రాణించేందుకు ప్రతిభతోపాటు నడవడిక, క్రమశిక్షణ, నిబద్దత మరీ ముఖ్యం. ఇవే ఒక వ్యక్తిని కొలిచే కొలమానాలు. ప్రతిభతో రాణించొచ్చు కానీ గౌరవం దక్కించుకోలేం. ఇవన్నీ ఉంటే అతడు మహరాజే. ప్రజలకు చేరువగా వెళ్లే సినీరంగంలో ఇవి మరింత ముఖ్యం. వీటిని తూ.చ తప్పకుండా పాటించి 46ఏళ్లుగా ప్రజల మనసుల్ని ఏలుతున్న హీరో మెగాస్టార్ (Mega Star) చిరంజీవి (Chiranjeevi). మరి.. పులి కడుపున పులే పుడుతుందన్నట్టు.. ఆయన వారసుడు రామ్ చరణ్ (Ram Charan) మరో చిరంజీవే అయ్యాడు. చిరంజీవి ఘనమైన సినీ వారసత్వాన్ని ఎలా కొనసాగిస్తున్నాడో.. ప్రతిభ, నడవడిక, క్రమశిక్షణ, నిబద్దతలో కూడా తండ్రి పేరు అలానే నిలబెడుతున్నాడు. మెగాభిమానులు సంతోషాన్ని.. మరెందరికో అసూయ కలిగించే ఘనత ఇది. అందుకే రామ్ చరణ్ అంటే మిస్టర్ కూల్.
చిరంజీవి ఇచ్చిన సలహా..
తండ్రిగా చిన్నప్పుడు చేయిపట్టి నడక నేర్పించిన చిరంజీవే.. సినిమాల్లో తొలి దశలోనూ రామ్ చరణ్ ను నడిపించారు. ఆపై.. రామ్ చరణ్ చూపుతున్న ప్రతిభ, ఏటికేడు ఎదుగుతున్న తీరు.. ఎదిగేకొద్దీ ఒదిగి ఉండే వ్యక్తిత్వం తన స్థాయిని, గౌరవాన్ని మరింత పెంచుతున్నాయనేది వాస్తవం. ఓ ఇంటర్వ్యూలో చిరంజీవి ఏం సలహాలిస్తారనే ప్రశ్నపై మాట్లాడుతూ.. ‘నాన్న నాకెప్పుడూ సినిమా, కథ, నటన విషయాల్లో సలహాలివ్వలేదు. క్రమశిక్షణ, సమయపాలన, ఎదుటివారితో నడుచుకునే తీరుపై మాత్రమే చెప్పా’రని అన్నాడు. ఈ మాటలు విన్నవారెవరైనా.. ఇది కదా నేర్పించాల్సింది అనిపించక మానదు. చిరంజీవి చూపిన దారిలో.. సూచించిన సలహాలతో రామ్ చరణ్ ఒక్కో మెట్టే ఎక్కుతూ ఇప్పుడు దేశందాటి అంతర్జాతీయస్థాయిలో పేరు ప్రఖ్యాతులు సంపాదించుకున్నారు. ఇది ఏమాత్రం చిన్న విషయం కాదు. సినిమాల్లో ప్రతిభ, పరిశ్రమలో చూపే వ్యక్తిత్వంతో సాధించుకున్నది.
అమితాబ్ బచ్చన్ తో..
కెమెరా ముందు నటనతో మెప్పించే రామ్ చరణ్.. కెమెరా వెనుక కూడా మంచి ఫ్యామిలీ మ్యాన్. చిరంజీవి మాటకు ఎంత విలువ ఉంటుందో రామ్ చరణ్ కూ అదే విలువ. ఇది చిరంజీవి కొడుకుగా తెచ్చుకుంది కాదు. తన వ్యక్తిత్వంతో చిరంజీవి పేరు నిలబెట్టేలా నడుచుకుంటున్న తీరుతో సాధ్యమైంది. ఔట్ డోర్ షూటింగ్స్ లో లోకల్ పీపుల్ తో మమేకమవడం.. అభిమానుల హోరులోనూ వారితో ఫొటోలు దిగడం.. సంతృప్తిపరచడం.. పెద్దవారిని గౌరవించడం ఇవే రామ్ చరణ్ ను సినీ ఇండస్ట్రీలో మేటిగా నిలబెడుతున్నాయి. ఇటివలి ఇండియన్ స్ట్రీట్ ప్రీమియర్ లీగ్ లో భాగంగా రామ్ చరణ్ ను అమితాబ్ బచ్చన్ ముందు నడవాల్సిందిగా కోరగా సున్నితంగా తిరస్కరించి మీరే ముందు అని చెప్పి తన వినయాన్ని చాటుకున్నాడు. ఇదే చిరంజీవి పెంపకం.. రామ్ చరణ్ వ్యక్తిత్వం. అభిమానులకు అదే నిత్య సంతోషం.