ఆప్ బాటలో పవన్.. గెలుపు ఖాయం..

పవన్ కళ్యాణ్ గత ఎన్నికల్లో రెండు చోట్ల నుంచి ఓడిపోయిన సంగతి తెలిసిందే. భీమవరం నుంచి పోటీ చేసిన పవన్ అక్కడ మంచి ఓటింగ్ సంపాదించుకున్నారు. ఆ అయితే, గాజువాకలో మాత్రం పెద్దగా ప్రభావం చూపలేకపోయాడు పవన్. ఆ పార్టీకి దక్కింది కేవలం ఒక్కసీటు మాత్రమే. కానీ, ఆ పార్టీ ఎమ్మెల్యే కూడా పవన్ తో కంటే జగన్ పార్టీతోనే ఎక్కువగా సఖ్యతగా ఉండటం విశేషం.

గత ఎన్నికల్లో విజయం గురించి పవన్ కొన్ని మాటలు చెప్పారు. ఎన్నికల్లో అన్ని పార్టీలు డబ్బులు పంచాయని, డబ్బు ప్రభావం ఎన్నికలపై చూపిందన్న పవన్, తాము మాత్రం ఎక్కడా కూడా ఒక్క రూపాయి కూడా పంచలేదని స్పష్టం చేశారు. నిజాయితీతో కూడిన రాజకీయాలు చేస్తామని, ప్రజలకు డబ్బులు పంచడం కాదని, ప్రజలకు అవసరమయ్యే పనులు చేయడం ముఖ్యమని పవన్ చెప్పిన సంగతి తెలిసిందే.

2020 ఢిల్లీ ఎన్నికల్లో ఆప్, బీజేపీలు రెండు కూడా డబ్బులు పంచలేదని, గత ఐదేళ్ళలో కేజ్రీవాల్ పాలన విషయంలో ప్రజల మెప్పు పొందారని, అందుకే బీజేపీని కాదని, ఆప్ కు ఓటేశారని, తాము కూడా ప్రజలకు నచ్చే పనులు మాత్రమే చేస్తామని, డబ్బులు పంచబోమని అన్నారు. పార్టీని నడపడం కోసమే సినిమాలు చేస్తున్నట్టు పవన్ పేర్కొన్నారు.

ఓటుకు కనీసం రెండువేలు ఇస్తేనే పోలింగ్ బూతుకు వచ్చి ఓటేసే పరిస్థితి ఉందని, రాజకీయ నాయకులు ఇలాంటి పరిస్థితి తీసుకొచ్చారని అన్నారు. ప్రజలు అధికారం ఇచ్చినా ఇవ్వకున్నా ప్రజలకోసమే పోరాటం చేస్తామని పవన్ ఈ సందర్భంగా పేర్కొన్నారు.