పవన్‌ మాటలు.. తూటాల్లా పేలుతున్నాయ్‌గానీ.!

జనసేన అధినేత పవన్‌ కళ్యాణ్‌, 2019 ఎన్నికల్లో దారుణ పరాజయాన్ని చవిచూశారు. పోటీ చేసిన రెండు చోట్లా ఆయన ఓడిపోయారు. పార్టీ అధినేత రెండు చోట్లా ఓడిపోతే, పార్టీ పరిస్థితి ఎంత దారుణంగా వుంటుందో అర్థం చేసుకోవడం పెద్ద కష్టమేమీ కాదు. జనసేన నుంచి గెలిచిన ఒకే ఒక్క ఎమ్మెల్యే కూడా ఆ పార్టీతో లేరిప్పుడు. కానీ, జనసేన అధినేత మాత్రం ధైర్యం కోల్పోలేదు. పార్టీ ముఖ్య నేతల సూచన మేరకు, సన్నిహితుల సలహా మేరకు జనసేన అధినేత ట్రాక్‌ మార్చారు.. తిరిగి సినిమాల్లో నటిస్తున్నారు.

సినిమాల్లో నటిస్తే, రాజకీయాలకు కాస్త బ్రేక్‌ ఇవ్వాల్సిందే. కానీ, అటు సినిమాలు – ఇటు రాజకీయాలు.. బ్యాలెన్సింగ్‌ మిస్‌ అవకుండా అన్నీ పక్కాగా ప్లాన్‌ చేసుకున్నాకే సినిమాల్లో రీ-ఎంట్రీ ఇచ్చారు పవన్‌ కళ్యాణ్‌. మరోపక్క, జనంలోకి వెళుతున్న పవన్‌ కళ్యాణ్‌, ఇదివరకటితో పోల్చితే ఇప్పుడు ఇంకాస్త భిన్నమైన రాజకీయ వ్యూహాల్ని అనుసరిస్తున్నారు.

‘ఓడిపోయినందుకు బాధ లేదు.. మీలో కొంతమంది అయినా, జనసేన పార్టీకి ఓటేశారు కదా.. ఆ ఓట్లకు న్యాయం చేయాలి కదా..’ అంటూ జనం తరఫున పోరాటంపై తనదైన శౖలిలో వ్యాఖ్యానిస్తున్నారు. ‘అప్పుడు నేను అది చెప్పాను.. మీరు విన్లేదు.. విని వుంటే ఈ దుస్థితి వచ్చేది కాదు..’ అని పవన్‌ ఎక్కడికి వెళ్ళినా ఆయా అంశాల్ని ప్రస్తావిస్తూ తాను ఎన్నికల సమయంలో ప్రజలకు చేసిన సూచనల గురించి ప్రస్తావిస్తున్నారు.

అమరావతిలోనూ జనసేన వ్యాఖ్యలు తూటాల్లా పేలాయి. ప్రత్యర్థుల్ని తన మాటలతో ఇరకాటంలో పెట్టడం అనేది వేరే విషయం. ఓటర్లను ఆలోచింపజేయడం.. అనేది కాస్త భిన్నమైన ప్రక్రియ. జనసేనాని చేస్తున్నది అదే. రాష్ట్ర వ్యాప్తంగా ఇప్పుడు ఎక్కడ విన్నా ఇదే చర్చ జరుగుతోంది. వైఎస్‌ జగన్‌ పాలనకు సంబంధించి అసంతృప్తితో వున్నవారంతా, జనసేనాని వ్యాఖ్యలతో ఏకీభవిస్తున్నారు.

మరోపక్క ప్రధాన ప్రతిపక్షం, అధికార పక్షంపై పోరాటం చేయడంలో విఫలమవుతున్న దరిమిలా.. జనసేన పార్టీ, రాష్ట్ర ప్రజలకు ప్రత్యామ్నాయంగా కన్పిస్తోంది. అయితే, జనం ఆలోచనల్లో ఈ మార్పు.. వచ్చే ఎన్నికల దాకా ఇలాగే వుంటుందా.? అన్నదే మిలియన్‌ డాలర్ల ప్రశ్న.

జనసేన అధినేత పవన్‌ కళ్యాణ్‌కి సినీ నటుడిగా వున్న ఫాలోయింగ్‌ని దృష్టిలో పెట్టుకున్నా, 2019 ఎన్నికల్లో జనసేనకు అంత దారుణమైన పరాజయం వచ్చేది కాదు. సో, జనసేన అధినేత.. ఓటర్లను ఆకట్టుకునే విషయంలో ఇంకా చాలా చాలా చేయాలి. టైవ్‌ు వుంది కదా.. ఆయన ఇంకే కొత్త ప్రక్రియలతో జనాన్ని ఎట్రాక్ట్‌ చేస్తారో వేచి చూడాల్సిందే.