సినిమాలపై మాట తప్పిన పవన్‌.. పెద్ద నేరమేనా.?

‘ఇకపై పూర్తి జీవితం ప్రజా సేవకే వెచ్చిస్తాను.. రాజకీయాల్లోనే కొనసాగుతాను తప్ప, సినిమాల గురించి ఆలోచించను..’ అని పలు సందర్భాల్లో జనసేన అధినేత పవన్‌ కళ్యాణ్‌ చెప్పిన మాట వాస్తవం. దాన్ని ప్రస్తావిస్తూ, పవన్‌ కళ్యాణ్‌పై కుప్పలు తెప్పలుగా విమర్శలు వస్తుండడమూ వాస్తవం. నిజమే, పవన్‌ కళ్యాణ్‌ మాట తప్పారు.. సినిమాల్లో నటించబోనని ప్రజల ముందు వాగ్దానం చేసి, మాట తప్పి.. మళ్ళీ సినిమాల్లో కొనసాగుతున్నారు. ఇంత పెద్ద నేరం చేసిన పవన్‌ కళ్యాణ్‌ని శిక్షించాల్సిందేనా.? ఈ ప్రశ్న చుట్టూ చాలా పెద్ద చర్చే జరుగుతోంది.

అయినా, పవన్‌ కళ్యాణ్‌ విషయంలోనే ఇంత చర్చ ఎందుకు జరగాలి.? అయినా, పవన్‌ కళ్యాణ్‌ సినిమాల్లో నటించడం వల్ల ఎవరికి నష్టం.? రెండు చోట్లా ఓడిపోయిన పవన్‌ కళ్యాణ్‌, సినిమాల్లో కొనసాగడం వల్ల ఏ నియోజకవర్గంలో అయినా ప్రజలు ఇబ్బంది పడతారా.? ఛాన్సే లేదు. పైగా, సినిమాల్లో నటించడం ద్వారా జనసేన పార్టీకి పవన్‌ కళ్యాణ్‌ కాస్తో కూస్తో ఊపు, ఉత్సాహం తెచ్చే అవకాశాలున్నాయి.

కానీ, పవన్‌ కళ్యాణ్‌ మాట తప్పాడు కాబట్టి.. తప్పుని సరిదిద్దుకునే క్రమంలో సినిమాలకి గుడ్‌ బై చెప్పాల్సిందేనన్న చిత్ర విచిత్రమైన డిమాండ్లు తెరపైకి వస్తుండడం గమనార్హం. ప్రత్యేక హోదాపై బీజేపీ, టీడీపీ, వైఎస్సార్‌ కాంగ్రెస్‌ మాట తప్పొచ్చు.. అది ప్రజలకు నష్టం కలిగించే విషయమే అయినా.. ఆ పార్టీ నిస్సిగ్గుగా రాజకీయాలు చేయొచ్చు.. ఆయా పార్టీలకు చెందిన నేతలు తమ తమ సంపాదనా వ్యాపకాల్లో నిమగ్నమైపోవచ్చు. కానీ, పవన్‌ కళ్యాణ్‌ మాత్రమే మాట మీద నిలబడిపోవాలి.

సినిమాల్లో నటించడం.. అంటే ఎవరి పొట్టా కొట్టే వ్యవహారమైతే కాదు కదా. ఇదే విషయాన్ని సోషల్‌ మీడియాలో జనసైనికులు ప్రస్తావిస్తున్నారు. ‘పవన్‌ కళ్యాణ్‌ మందిని వెంటేసుకుని రాజకీయాల్లోకి రాలేదు. తన సొంత బలాన్ని నమ్ముకుని రాజకీయాల్లోకి వచ్చిన వ్యక్తి ఆయన.. ఎవరూ తన వెంట లేకపోయినా.. 30 ఏళ్ళు జనసేన పార్టీని నడపగల సత్తా వుందనే నమ్మకంతో వున్న వ్యక్తి పవన్‌ కళ్యాణ్‌. జనసేన పార్టీ నుంచి ఎవరు బయటకు వెళ్ళినా నష్టం వుండదు’ అని జనసేన పార్టీకి చెందిన ముఖ్య నేతల్లో ఒకరైన శివశంకర్‌ అభిప్రాయపడ్డారు.