ప్రచారం హడావుడిలో బాబు చేసిన ఆ తప్పే.. ప్రజలకు తిప్పలు తెచ్చిందా?

2019 నవంబర్ 1 భారత ప్రభుత్వం కొత్త ఇండియన్ మ్యాప్ ను రిలీజ్ చేసింది. జమ్మూ కాశ్మీర్ పునర్వ్యవస్తీకరణ తరువాత ఈ మ్యాప్ ను రిలీజ్ చేశారు. ఇందులో అన్ని రాష్ట్రాలకు రాజధానులు ఉన్నాయి. మ్యాప్ లో ఆంధ్రప్రదేశ్ కు మాత్రం రాజధానిని సూచించలేదు. గుర్తించలేదు. ఇదే జగన్ కు ప్లస్ అయ్యింది. దీనిని అడ్డం పెట్టుకొని ఎత్తులు వేయడం మొదలుపెట్టారు. అప్పటి వరకు రాజధానిని మార్చాలి అనే ఆలోచన నర్మగర్భంగా ఉన్నా, ఈ మ్యాప్ రిలీజ్ తరువాత బహిర్గతం చేశారు.

సాక్షాత్తు ప్రధాని భూమి పూజ చేసి శంకుస్థాపన చేసిన అమరావతికి చట్టబద్దత లేకపోవడం ఏంటి ? ఈ తప్పు ఎవరు చేశారు. ఎందుకు చేశారు అనే విషయాలను లోతుగా పరిశీలిస్తే అనే రహస్య విషయాలు వెలుగు చూస్తున్నాయి. అమరావతి రాజధానిగా ప్రకటించిన తరువాత బాబు ఆ రాజధానికి ప్రపంచంలో పేరు తీసుకొచ్చేందుకు హడావుడిగా ప్రచారం చేయడం మొదలుపెట్టారు. ప్రపంచదేశాల్లో అమరావతికి గుర్తింపు తెచ్చే ప్రయత్నంలోనే మునిగిపోయారు తప్పించి బాబు అసలు అమరావతికి గెజిట్ నోటిఫికేషన్ వెలువడిందా లేదా అని చూసుకోలేదు.

ముఖ్యమంత్రికి ఆ విషయం తెలియకుండా ఉంటుందా చెప్పండి. తెలిసే ఉంటుంది. కానీ, పట్టించుకున్నారని అనుకోలేదు. ఎందుకంటే, అప్పటికే తెలుగుదేశం పార్టీ కేంద్రానికి దూరం అయ్యింది. కేంద్రంతో బాహాబాహీకి దిగింది. ఈ సమయంలో ఈ విషయం గురించి బాబు కేంద్రం దగ్గరకు వెళ్లి అమరావతి గురించి అడిగే పరిస్థితి లేదు. పైగా ఏ పార్టీకి వ్యతిరేకంగా తెలుగుదేశం ఆవిర్భవించిందో ఆ పార్టీతోనే పొత్తు పెట్టుకున్నారు. అదికూడా మోడీని ఓడించాలనే ఎత్తుగడాతోనే. అందుకే ఈ నోటిఫికేషన్ గురించి అడగలేకపోయి ఉండొచ్చు. దీనిని జగన్ తనకు అనుకూలంగా మార్చుకున్నాడు.

గెజిట్ నోటిఫికేషన్లో అమరావతి గురించి పేర్కొని ఉంటె, ఇప్పుడు రాజధానిని మార్చేవారు కాదు. సాంకేతికంగా అమరావతికి చట్టబద్దత కల్పించడంలో బాబు ఫెయిల్ కావడంతో జగన్ మూడు రాజధానుల అంశం తెరమీదకు తీసుకొచ్చారు. ఇదే ఇప్పుడు ప్రజలకు తిప్పలు తెచ్చిపెడుతుంది. అధికారం కోసం, ప్రచారం కోసం బాబు చేసిన హడావుడి ఇన్ని అనర్ధాలకు కారణం అయ్యింది. నిధులు లేవు, అమరావతి ముంపు ప్రాంతంలో ఉన్నది అని చెప్తూ వచ్చిన నేతలు, మంత్రులు ఇండియా మ్యాప్ రిలీజ్ తరువాత అసలు విషయాన్ని బహిర్గతం చేశారు.