ఈపీఎస్, ఓపీఎస్.. సీఎం అభ్యర్థిగా ఎవరికి ఎస్?

తమిళనాడు అధికార పార్టీ అన్నాడీఎంకేలో ఆధిపత్య పోరు షురూ అయ్యింది. వచ్చే ఏడాది తమిళనాడు అసెంబ్లీకి ఎన్నికలు జరగనున్న తరుణంలో ముఖ్యమంత్రి అభ్యర్థిత్వంపై సీఎం ఎడపాడి పళనిస్వామి (ఈపీఎస్), డిప్యూటీ సీఎం ఓ.పన్నీర్ సెల్వం (ఓపీఎస్)ల మధ్య మాటలయుద్ధం చోటుచేసుకుంది. సోమవారం జరిగిన అన్నాడీఎంకే కార్యవర్గ సమావేశం.. ఇరువురు నేతల బలాబాలకు వేదికగా మారింది. ఇరువురు నేతల మద్దతుదారులు రెండు వర్గాలుగా విడిపోయి తమ తమ నేతలు వచ్చినప్పుడు వారికి మద్దతుగా పెద్దపెట్టున నినాదాలు చేశారు.

అనంతరం జరిగిన భేటీలో సీఎం అభ్యర్థిగా నేను ఉండాలంటే నేను ఉండాలంటూ ఇరువురూ వాదులాడుకున్నారు. తనను సీఎంగా రెండుసార్లు దివంగత జయలలితే ఎంపిక చేసినందున తనకే అవకాశం ఇవ్వాలని పన్నీర్ సెల్వం పేర్కొనగా.. ఇద్దరినీ శశికళే ఎంపిక చేశారని పళనిస్వామి వాదించారు. ఈ నేపథ్యంలో ఈ అంశాన్ని తేల్చేందుకు 11 మందితో కమిటీ వేయాలని పన్నీర్ ప్రతిపాదించగా.. కమిటీ అవసరం లేదని, పార్టీపరంగానే నిర్ణయం తీసుకోవచ్చని పళనిస్వామి స్పష్టంచేశారు.

దాదాపు 5 గంటలపాటు సమావేశం వాడీవేడిగా జరిగినా ఈ విషయంలో ఏకాభిప్రాయానికి రాలేకపోయారు. ఈ నేపథ్యంలో అక్టోబర్ 7న జరగబోయే జనరల్ బాడీ భేటీలో సీఎం అభ్యర్థి ఎవరనే విషయంపై స్వామి, సెల్వం సంయుక్త ప్రకటన చేస్తారని అన్నాడీఎంకే డిప్యూటీ కోఆర్డినేటర్ మునుస్వామి ప్రకటించారు. ఈలోగా ఇరువురు నేతలు చర్చించుకుని ఏకాభిప్రాయానికి వస్తారని అంటున్నారు.

అయితే, ఎవరికి వారు పట్టుదలగా ఉన్న నేపథ్యంలో ఈ వివాదం పరిష్కారమవుతుందా లేదా అనేదానిపై ఆసక్తి నెలకొంది. నిజానికి పలువురు మంత్రులతోపాటు పార్టీ జిల్లా కార్యదర్శుల్లో అత్యధిక మంది మద్దతు పళనిస్వామికే ఉందని తెలుస్తోంది. అయినప్పటికీ, సోమవారం నాటి సమావేశంలో ఏ నిర్ణయం తేలకుండా వాయిదా పడేలా చేయడంలో పన్నీర్ విజయవంతంమయ్యారు.

గత రెండు నెలల నుంచీ సాగుతున్న ఈ వివాదం మళ్లీ వాయిదా పడింది. అక్రమాస్తుల కేసులో జైలులో ఉన్న శశిశకళకు వ్యతిరేకంగా వ్యవహరించిన పన్నీర్ కు పార్టీపరంగా మద్దతు తగ్గిందని అంటున్నారు. ఈ నేపథ్యంలో శశికళ మేనల్లుడు, అన్నాడీఎంకే రెబెల్ నేత టీటీవీ దినకరన్ తో పన్నీర్ సత్సంబంధాలు నడుపుతూ పార్టీపై పట్టు కోసం ప్రయత్నిస్తున్నారు. కానీ ఎక్కువమంది మద్దతు పళనికే ఉండటంతో ఆయనే మరోసారి సీఎం అభ్యర్థిగా ఎంపికయ్యే అవకాశాలు కనిపిస్తున్నాయి.