డిసెంబర్ లో మరో వైరస్?

కరోనా కల్లోలంతో ప్రపంచం అతలాకుతలమవుతున్న తరుణంలో బాల మేధావి అభిజ్ఞా ఆనంద్ మరో సంచలన విషయం వెల్లడించాడు. ఈ ఏడాది డిసెంబర్ లో మరో వైరస్ తన ప్రతాపం చూపించనుందని హెచ్చరించాడు. అది 2021 మార్చి 31 వరకు ప్రపంచాన్ని అల్లకల్లోలం చేస్తుందని జోస్యం చెప్పాడు.

అసలే కరోనాతో వణికిపోతున్న జనాలు అభిజ్ఞ చెప్పిన విషయం విని మరింత ఆందోళన చెందుతున్నారు. కరోనా వైరస్ గురించి గతేడాది ఆగస్టులోనే ఓ యూట్యాబ్ వీడియోలో అతడు హెచ్చరించిన విషయం తాజాగా వైరల్ అయిన సంగతి తెలిసిందే. అందులో చెప్పినట్టుగానే ప్రస్తుత సంఘటనలు జరగడంతో అతడిపై నెటిజన్లకు అపారమైన నమ్మకం ఏర్పడింది. ఈ నేపథ్యంలో అతడి వీడియోలను ఫాలో అవుతున్నారు. తాజాగా అభిజ్ఞ ఓ కొత్త వీడియోను పోస్టు చేశాడు. అందులో మరిన్ని ఆసక్తికరమైన విషయాలు వెల్లడించాడు.

ప్రస్తుత గ్రహ స్థితిగతులను బట్టి అంచనా వేస్తే కరోనా కల్లోలం జూన్ 30 నుంచి నెమ్మదిగా తగ్గుముఖం పడుతుందని, మే 4 వరకు ఆహార ధాన్యాల కొరత ఉంటుందని చెప్పాడు. అలాగే ఆర్థిక వ్యవస్థ కూడా తీవ్రంగా ప్రభావితం అవుతుందని వివరించాడు. వైరస్ ల నుంచి మనల్ని మనం రక్షించుకోవాలంటే రోగ నిరోధక శక్తి పెంపొందించుకోవడం ఒక్కటే మార్గమని స్పష్టంచేశాడు.

‘కరోనా వైరస్ కు వ్యాక్సిన్ కనిపెట్టొచ్చు. కానీ చాలా వైరస్ లు వస్తాయి. సూపర్ బగ్ లు వస్తాయి. అందువల్ల మన రోగ నిరోధక శక్తిని పెంపొందించుకోవాలి. ఇది మనం పెంపొందించుకోనంత కాలం ఏ సైన్సూ మనల్ని కాపాడలేదు. ఒక్క వైరస్ కి మందు కనిపెడితే వందలాది వైరస్ లు పుట్టుకొస్తాయి. వీటిని ఎదుర్కొనే శక్తిని మనం సంతరించుకోవాలి. ఇందుకోసం ఆర్గానిక్ సాగును పెంచాలి. జంతువులను చంపడం మానేయాలి.

కరోనా కంటే మరింత ప్రమాదకరమైన వైరస్ ఈ డిసెంబర్ లో రాబోతోంది. అది వచ్చ ఏడాది మార్చి 31 వరకు వీరవీహారం చేస్తుంది. దానిని ఎదుర్కొనేందుకు ఇప్పటి నుంచే మనం సమాయత్తం కావాలి’ అని పేర్కొన్నాడు. భూమి, జంతువులకు హాని తలపెట్టడం ఆపాలని సూచించాడు. జంతువులను చంపడం మానేస్తే పరిస్థితి మెరుగవుతుందని స్పష్టంచేశాడు. మాంసాన్ని విక్రయించేవారు మెరుగైన ప్రపంచం కోసం తమ వృత్తిని త్యాగం చేయాలన్నాడు.

పసుపు, అలోవెరా, అమృతవల్లి, నిమ్మ తదితర పదార్ధాల ద్వారా రోగ నిరోధక శక్తిని పెంపొందించుకోవాలని అభిజ్ఞ సూచించాడు. ఇప్పటికే అతడు చెప్పిన విషయాలు దాదాపు నిజం కావడంతో డిసెంబర్ లో మరో వైరస్ రావడం ఖాయమని పలువురు విశ్వసిస్తున్నారు.