ఐటమ్, స్టెప్నీ.. నిషేదిత పదాలు.! బూతులైతే శ్రవణానందకరమా.?

వైసీపీ నేత వాసిరెడ్డి పద్మ తాజాగా సోషల్ మీడియా వేదికగా ఆసక్తికరమైన పోస్ట్ ఒకటి పెట్టారు. ‘ఐటమ్ వంటి పదాలకు జైలు శిక్షలు పడుతున్న రోజులివి. అన్ని రాజకీయ పార్టీలూ ఈ విషయాన్ని గుర్తెరగడం మంచిది..’ అంటూ వాసిరెడ్డి పద్మ ఓ ట్వీటేశారు.

ఆ ట్వీటులో సొంత పార్టీ వైసీపీని ప్రస్తావించారు. టీడీపీ, జనసేన అలాగే భారతీయ జనతా పార్టీ.. పనిలో పనిగా కాంగ్రెస్ పార్టీ పేర్లను కూడా వాసిరెడ్డి పద్మ తన ట్వీటులో పేర్కొనడం గమనార్హం.

మరో ట్వీట్‌లో ‘మహిళల పట్ల నీచాతినీచంగా పోస్టులు పెట్టేవారు ఎవరైనా కఠిన చర్యలు తీసుకోవాలని.. స్పెషల్ టీమ్‌లతో సోసల్ మీడియాని కట్టడి చేయాలని మహిళా కమిషన్ ఈ రోజు డీజీపీని కోరింది..’ అని పేర్కొన్నారు వాసిరెడ్డి పద్మ.

ఈ విషయంలో వాసిరెడ్డి పద్మని అభినందించాల్సిందే. ఇందులో ఇంకో మాటకు తావు లేదు. ఆంధ్రప్రదేశ్ మహిళా కమిషన్ ఛైర్మన్‌గా వాసిరెడ్డి పద్మ, అందరికీ ఒకే తరహా ‘పద్ధతి’ వుండాలని ఆకాంక్షిస్తూ ఆయా రాజకీయ పార్టీలను తన ట్వీట్లలో ప్రస్తావించారు మరి.!

అయితే, ‘ఐటమ్’ వంటి పదాలకు జైలు శిక్షలు పడుతున్న రోజులివి.. అని వాసిరెడ్డి పద్మ చెప్పారుగానీ, ఆంధ్రప్రదేశ్ రాష్ట్రంలో ఇంతవరకు ఎక్కడైనా అలాంటి శిక్ష పడిందా.? మంత్రిగా వున్న సమయంలోనూ, మంత్రి పదవి పోయాక కూడా కొడాలి నాని ఎలాంటి మాటలు మాట్లాడుతున్నారో చూస్తున్నాం. వైసీపీ ఎమ్మెల్యే ద్వారంపూడి చంద్రశేఖర్ రెడ్డి మాట్లాడిన బూతులు.. మాజీ మంత్రి బాలినేని శ్రీనివాస్ రెడ్డి బూతులు.. వీటన్నిటి సంగతేంటి.?

అయ్యన్న పాత్రుడు మాట్లాడినా, ఇంంకెవరు మాట్లాడినా.. పార్టీలకతీతంగా తొలుత రాజకీయ నాయకులకు శిక్షలు పడాలి. కేసులు పెట్టి ఊరుకోవడం కాదు.! పైగా, ఇలాంటి శిక్షలనేవి అధికార పార్టీ నుంచే మొదలవ్వాలి. అప్పుడే, మిగతావారిలో జాగ్రత్త పెరుగుతుంది. అదే సమయంలో, అధికార పార్టీ బాధ్యతాయుతమైన తీరు పట్ల సర్వత్రా హర్షం వ్యక్తమవుతుంది కూడా.!

పవన్ కళ్యాణ్ ఏదో అన్నారని నోటీసులు ఇచ్చిన ఏపీ మహిళా కమిషన్ ఛైర్ పర్సన్, ఛండాలమైన బూతులు మాట్లాడిన వైసీపీ నేతల్లో ఎంతమందికి నోటీసులు ఇచ్చారో ట్విట్టర్ ద్వారా అయినా చెప్పగలిగితే మంచిది.! కానీ, అంత సాహసం ఆమె చేయగలరా.?

‘చిన్న చిన్న మాటలు మీకు తప్పుడు మాటల్లా అనిపిస్తున్నాయి.. బూతులైతే మహిళా కమిషన్ దృష్టిలో శ్రవణానందకరమా.?’ అని నెటిజన్లు ప్రశ్నించే పరిస్థితి ఎందుకు వస్తోందన్న విషయమై ఏపీ మహిళా కమిషన్ ఛైర్ పర్సన్‌గా వాసిరెడ్డి పద్మ ఆత్మవిమర్శ చేసుకుంటే మంచిదేమో.!