భారతీయులు.. సంపదకు అటూ ఇటూ!

మనదేశం.. భిన్న సంస్కృతులు, భిన్న మతాలు, భిన్న భాషలకు నిలయం. సంపద విషయంలోనూ అలాగే ఉంది. ధనిక, పేదల మధ్య భారీ తేడా ఉంది. ఓవైపు సంపన్నులు పెరుగుతున్నా.. పేదరికంలో మాత్రం అంతగా మార్పు ఉండటంలేదు. కొత్తగా సంపన్నులుగా మారుతున్నవారి విషయంలో ప్రపంచంలోనే భారత్ ఐదో స్థానంలో ఉండటం విశేషం. అదే సమయంలో దేశంలోని 78 శాతం మంది సంపద కేవలం రూ.7 లక్షల లోపే ఉండటం మరో అంశం.

ప్రపంచ సంపదపై క్రెడిట్ సుస్సీ సంస్థ తాజాగా వెల్లడించిన నివేదికలో ఈ విషయాలను పొందుపరిచింది. మన జనాభాలోని వయోజనుల్లో కోటిన్నర మంది మాత్రమే లక్ష డాలర్ల (దాదాపు రూ.70 లక్షలు) పైబడిన సంపద కలిగి ఉన్నారు. ఇక రూ.35 కోట్ల సంపద కలిగిన ఉన్న వయోజనులు 4,460 మంది ఉండగా.. రూ.70 కోట్ల పైబడిన సంపద సొంతం చేసుకున్నవారి సంఖ్య 1490 మంది మాత్రమే. భారతదేశ మొత్తం సంపదలో అత్యధిక భాగం వీరిదే. ప్రపంచ కుబేరుల్లో భారతీయుల సంఖ్య 2 శాతంగా ఉంది.

మొత్తానికి భారతదేశంలో సంపన్నుల సంఖ్య క్రమంగా పెరుగుతోందని ఈ నివేదిక చెబుతోంది. 2024 నాటికి దాదాపు 10 లక్షల మంది భారతీయులు మిలియనీర్లు అవుతారని క్రెడిట్ సుస్సీ నివేదిక అంచనా వేసింది. ఇక భారతీయుల సగటు సంపదలోనూ గణనీయమైన వృద్ది నమోదైంది. 2000 సంవత్సరంలో 2,127 డాలర్ల సగటు ఆదాయం ఉండగా.. 2019 మధ్య నాటికి అది 14,569 డాలర్లకు చేరింది.

సంపద మాట అటు ఉంచితే భారత్ లోని ప్రతి వయోజనుడిపైనా 1345 డాలర్ల (దాదాపు రూ.లక్ష) అప్పు కూడా ఉంది. భారతీయుల సంపదలో అధికభాగం రియల్ రంగంలోనే ఉందని నివేదిక నిర్దారించింది. ఇళ్ల ధరల పెరుగుదలతోనే భారతీయుల సంపద కూడా పెరిగిందని పేర్కొంది.