ఇన్‌సైడ్‌ రిపోర్ట్‌: రాజధాని అమరావతి మారదుగానీ.!

ఆంధ్రప్రదేశ్‌ రాజధాని అమరావతి మారుతుందా.? ఇంకో చోటకి తరలి వెళుతుందా.? అనే అంశం చుట్టూ గత కొద్ది రోజులుగా తీవ్రమైన చర్చ జరుగుతోంది. ‘వైఎస్సార్‌ కాంగ్రెస్‌ పార్టీ అధికారంలోకి వస్తే రాజధాని అమరావతి నాశనమైపోతుంది.. రాజధానిని అక్కడి నుంచి తరలించేస్తారు..’ అంటూ ఎన్నికల ప్రచారంలో అప్పటి ముఖ్యమంత్రి, టీడీపీ అధినేత చంద్రబాబు చెప్పినట్లుగానే ఆ తర్వాతి పరిణామాలు కన్పించాయి.

రాజధాని మార్పుకి సంబంధించి మంత్రి బొత్స సత్యనారాయణ ఇటీవలి కాలంలో చేసిన, చేస్తున్న వ్యాఖ్యల పట్ల తీవ్ర వ్యతిరేకత వ్యక్తమవుతోంది. ఆ సెగని ముఖ్యమంత్రి వైఎస్‌ జగన్‌ కూడా ఎదుర్కొన్నారు. మరోపక్క, అమరావతి పరిధిలోని వైసీపీ నేతలు కూడా, రాజధానిని మార్చొద్దంటూ అధినేతకు అంతర్గత సమావేశాల్లో సూచించారట. ప్రజల నుంచి వెల్లువెత్తుతున్న వ్యతిరేకత నేపథ్యంలో అమరావతిని మార్చకూడదనే నిర్ణయానికి ముఖ్యమంత్రి వైఎస్‌ జగన్‌ వచ్చారని తెలుస్తోంది.

అయితే, రాజధాని కోసం చంద్రబాబు ప్రభుత్వం ప్రతిపాదించిన ప్రాంతంలో కొన్ని మార్పులు వుండబోతున్నాయని సమాచారమ్‌. అత్యంత విశ్వసనీయ వర్గాల సమాచారం, కృష్ణా నదికి మరీ సమీపంగా కాకుండా, కొంత దూరంలో రాజధాని నిర్మాణం జరగనుందట. అయితే, చంద్రబాబు హయాంలో చెప్పినట్లు అంతర్జాతీయ స్థాయి రాజధాని కాదుగానీ.. సకల సౌకర్యాలతో పరిమిత ప్రాంతంలో మాత్రమే రాజధాని నిర్మాణం జరగబోతోందని సమాచారమ్‌.

అదే సమయంలో, హైకోర్టు సహా కొన్ని కీలకమైన అధికారిక భవనాలకు సంబంధించి ఎటూ తేల్చుకోలేకపోతోంది వైఎస్‌ జగన్‌ సర్కార్‌. రాయలసీమలో హైకోర్టు పెట్టాలనీ, ఉత్తరాంధ్రకు కొన్ని అధికారిక భవనాలు కేటాయించాలనీ.. డిమాండ్లు పుట్టుకొస్తున్న విషయం విదితమే. వాటన్నిటిపైనా కొద్ది రోజుల్లోనే క్లారిటీ ఇవ్వబోతున్నారట ముఖ్యమంత్రి వైఎస్‌ జగన్‌ మోహన్‌ రెడ్డి.