మెగాస్టార్ బర్త్ డే స్పెషల్స్: మాస్ కు కేరాఫ్ అడ్రెస్ గా నిలిచిన చిరంజీవి ‘ముఠామేస్త్రి’

కమర్షియల్ అంశాలు ఎక్కువగా ఉండే మాస్ కథాంశాల్ని చిరంజీవి ఎక్కువగా చేశారు. పాత్రను అన్వయం చేసుకుని తనదైన శైలిలో నటించి హీరోగా చిరంజీవి ఎలివేట్ అయిన తీరు ఒక అద్భుతం. క్యారెక్టర్ లో పరకాయ ప్రవేశం చేసి, అలవోకగా కామెడీ పండిస్తూ, తన హావభావాలతో మాస్ హీరోగా తిరుగులేని స్థాయికి చేరుకున్నారు. అలా.. చిరంజీవి మాస్ ఇమేజ్ ను మరోస్థాయిలో నిలబెట్టిన సినిమా ‘ముఠామేస్త్రి’. మెగాస్టార్ గా శిఖరంలాంటి క్రేజ్ తో ముఠామేస్త్రిగా ఊరమాస్ పాత్రలో చిరంజీవి అలరించారు. ముఖ్యంగా.. రఫ్ గెడ్డం, లుంగీ కట్టు, మెడలో ఎర్ర తువ్వాలుతో మేకోవర్ మాస్ కు కేరాఫ్ అడ్రస్ గా నిలిచింది. సినిమాలో ఆయన కామెడీ టైమింగ్, ఫైట్స్, డ్యాన్స్ ఓ రేంజ్ లో వర్కౌట్ అయ్యాయి. దీంతో చిరంజీవి కెరీర్లో మరో సూపర్ హిట్ గా నిలిచింది ‘ముఠామేస్త్రి’
.
మాస్ డైలాగులు..

సినిమాలో చిరంజీవి ఎంట్రన్స్ నుంచే పాత్ర తాలూకు స్వభావం తెలిసిపోతుంది. క్యారెక్టర్ బేస్డ్ సినిమా కావడంతో కూరగాయల మార్కెట్ లో రాజకీయాలు, సమస్యలను పరిష్కరిస్తూ చివరిగా రాజకీయాల్లోకి వెళ్లడమే సినిమా కథ. దీంతో.. ముఠామేస్త్రి సినిమాతోనే ‘చిరంజీవి రాజకీయాల్లోకి వస్తే..’ అనే ఊహాగానాలు అప్పట్లోనే వచ్చాయి. సినిమాలో రాజకీయాల్లోకి వెళ్లి మంత్రిగా చేయడం ఇందుకు కారణమైంది. సినిమాలో చిరంజీవి మాస్ డైలాగ్ వెర్షన్, వాటిని పలికే తీరు చిరంజీవే సాటి అనేలా చేశాయి. విలన్లను ‘దొంగనాడొడుకు’, సీఎంతో మీనాను ఉద్దేశించి.. ‘నా జింగులకిడి’ అనడం, మంత్రిగా ప్రమాణం చేసే సమయంలో.. ‘నేను మంత్రిని కదా.. స్టెప్పేస్తే బాగోదు’, బోసూ.. అని విలన్ అంటే.. నోసు పగిలిపోద్ది.. బామ్మర్దిని పిలిచినట్టు ఏంటా చనువు’.. అనే డైలాగులే ఇందుకు నిదర్శనం. ‘స్టోరీ మారిపోద్ది’ అనే చిరంజీవి మేనరిజమ్ బాగా పేలింది.

చిరంజీవి డ్యాన్సులు..

కామాక్షీ దేవీ కమల్ కంబైన్స్ బ్యానర్ పై కె.సి.శేఖర్ బాబు, డి.శివప్రసాద్ రెడ్డి సంయుక్తంగా ఈ సినిమా నిర్మించారు. దర్శకుడు ఎ.కోదండరామిరెడ్డి దర్శకత్వంలో తెరకెక్కిన ముఠామేస్త్రి చిరంజీవితో ఆయనకు ఇదే ఆఖరు సినిమాగా నిలిచింది. సినిమాకు రాజ్-కోటి అందించిన సంగీతం చార్ట్ బస్టర్స్ గా నిలిచాయి. ముఖ్యంగా ‘ఈ పేటకు నేనే మేస్త్రి..’ టైటిల్ సాంగ్ విపరీతంగా పాపులర్ అయింది. పాటకు అందించిన సంగీతం, ఎస్పీ బాలు గాత్రానికి తోడు చిరంజీవి వేసిన స్టెప్స్ కు ధియేటర్లు హోరెత్తిపోయాయి. 1993 జనవరి 17న విడుదలైన ఈ సినిమా బాక్సాఫీస్ వద్ద సూపర్ హిట్ గా నిలిచి.. 30 కేంద్రాల్లో శతదినోత్సవం జరుపుకుంది. సినిమాలో చిరంజీవి నటనకు ఉత్తమ హీరోగా ఫిలింఫేర్ అవార్డు దక్కింది. హీరోయిన్లుగా మీనా, రోజాలకు చిరంజీవితో ఇదే తొలి సినిమా.