మమత, కేసీయార్.. ప్రధాని పీఠమెక్కేదెవరు.?

తెలంగాణ ప్రజానీకం గట్టిగా ఆశీర్వదిస్తే, దేశంలో అందరూ కలిసొస్తే.. ప్రధాని పదవి దక్కడంలో వింతేముంది.? అంటూ కేసీయార్ విషయంలో తెలంగాణ రాష్ట్ర సమితి గట్టిగా చెబుతోంది. కేసీయార్, భావి ప్రధాని.. అంటూ అప్పుడే గులాబీ శ్రేణులు నినదిస్తున్నాయి.

జాతీయ రాజకీయాల్లో చక్రం తిప్పాలన్న ‘ఆలోచన’ కేసీయార్ చేయడం ఇదే కొత్త కాదు. గతంలోనూ ఆయన పలు ప్రయత్నాలు చేశారు. అయితే, ఏ ప్రయత్నమూ సత్ఫలితాన్నివ్వలేదు. అయినాగానీ, పట్టువదలని విక్రమార్కుడిలా కేసీయార్ తన ప్రయత్నాలు తాను చేస్తూనే వున్నారు.

మరోపక్క, జాతీయ రాజకీయాల్లో తనదైన ముద్ర ఎప్పుడో వేసేసిన పశ్చిమబెంగాల్ ముఖ్యమంత్రి మమతా బెనర్జీ కూడా ప్రధాని పీఠంపై కన్నేశారు. కానీ, ఆమె కూడా సరైన సమయం కోసం ఎదురుచూస్తున్నారు. జాతీయ స్థాయిలో తమతో కలిసొచ్చే నాయకుల్ని, పార్టీల్నీ కలుపుకుపోవడానికి అటు మమతా బెనర్జీ, ఇటు కేసీయార్ తమ ప్రయత్నాల్ని ముమ్మరం చేశారు.

అయితే, పశ్చిమబెంగాల్ ముఖ్యమంత్రి అయినా.. తెలంగాణ ముఖ్యమంత్రి అయినా.. జాతీయ రాజకీయాల్లో చక్రం తిప్పడం అంత తేలిక కాదు. జాతీయ స్థాయిలో కలిసొచ్చే అన్ని పార్టీలనూ ఒక్కతాటిపైకి తీసుకురావడం చాలా చాలా కష్టం.

కేసీయార్‌తో పోల్చితే మమతా బెనర్జీకి కాస్త అడ్వాంటేజ్ ఎక్కువ. అలాగని ఆమె నాయకత్వాన్ని మిగిలిన పార్టీలు అంగీకరిస్తాయా.? అంటే ఇప్పుడే చెప్పడం తొందరపాటు అవుతుంది. ప్రధాని పీఠంపై కన్నేసిన నాయకుల సంఖ్య పదుల సంఖ్యలో వుంటుంది. అలాంటోళ్ళు ప్రధాని పీఠం తాము ఎక్కలేకపోయినా, ఇతరుల్ని కిందకు లాగేసే శక్తిని కలిగి వుంటారు.

అన్నట్టు, కేసీయార్.. తెలంగాణతోపాటు ఆంధ్రప్రదేశ్‌లోనూ ముందుగా ఇమేజ్ పెంచుకోవాల్సి వుంటుంది. కానీ, అది సాధ్యమయ్యే పని కాదు. సాటి తెలుగు రాష్ట్రంలో ‘పవర్’ చాటుకోకుండా, జాతీయ స్థాయిలో కేసీయార్ సత్తా చాటుతానంటే అది జరిగే పనేనా.?