కేసీయార్ నోట, పవన్ కళ్యాణ్ మాట.! ఇదీ జనసేనాని ‘పవర్’.!

‘ఎవర్నో గద్దెనెక్కించడానికీ, ఎవర్నో గద్దె దించడానికి కూటములు ఏర్పడటం కాదు.. రాజకీయాలు చేయడం కాదు. ప్రజల్ని పల్లకీ ఎక్కించడం కోసమే రాజకీయాలు వుండాలి..’ అంటూ తెలంగాణ రాష్ట్ర సమితి అధినేత, తెలంగాణ ముఖ్యమంత్రి కల్వకుంట్ల చంద్రశేఖర్ రావు తమ పార్టీ ఆవిర్భావ దినోత్సవ వేడుకల్లో ఆసక్తికరమైన వ్యాఖ్యలు చేశారు.

ఎక్కడో విన్నట్టుంది కదూ ఈ మాట.! ఔను, విన్న మాటే ఇది. ఆ మాట చెప్పిందెవరో కాదు, జనసేన అధినేత పవన్ కళ్యాణ్. ఆంధ్రప్రదేశ్ రాజకీయాల్లో అధికార వైసీపీ అత్యంత దిగజారుడుతనం ప్రదర్శిస్తున్న దరిమిలా, జనసేనాని ప్రస్తుత రాజకీయాలపై ఆసక్తికరమైన వ్యాఖ్యలు చేశారు.

ఎవర్నో పల్లకీ ఎక్కించడానికి తాము రాజకీయాల్లోకి రాలేదనీ, ప్రజల్ని పల్లకీ ఎక్కించాలనే ఉద్దేశ్యంతోనే జనసేన పార్టీ ఆవిర్భవించిందనీ జనసేనాని పవన్ కళ్యాణ్ వ్యాఖ్యానించారు. ఈ వ్యాఖ్యలే ఇప్పుడు తెలంగాణ ముఖ్యమంత్రి కల్వకుంట్ల చంద్రశేఖర్ రావు నోట బయటకు వచ్చాయి.

ఆసక్తికరమైన విషయమే ఇది. నిజానికి, టీఆర్ఎస్, జనసేన మధ్య చిన్నపాటి రాజకీయ వైరం వుంది. అది గతంలో కాస్త ఎక్కువగా వుండేది. తెలంగాణలో టీఆర్ఎస్‌కి వైరి పక్షమైన బీజేపీకి, జనసేన మిత్రపక్షం. అయినాగానీ, బీజేపీ తమ మిత్రపక్షం జనసేన పట్ల అంత సానుకూలంగా తెలంగాణలో. ఏపీలో మాత్రమే బీజేపీ – జనసేన మధ్య పొత్తు నడుస్తోంది.

ఇంకోపక్క తెలంగాణలో జనసేన మరీ అంత యాక్టివ్‌గా లేదు.. అలాగని డీలా పడిందీ లేదు. ప్రజలెదుర్కొంటున్న సమస్యలపై ఏపీలో ఎలాగైతే జనసేన స్పందిస్తోందో, తెలంగాణలోనూ అలాగే స్పందిస్తోంది. రాజకీయంగా వేర్వేరు దారుల్లో వెళుతున్నా, పవన్ కళ్యాణ్ నాయకత్వ లక్షణాన్ని తెలంగాణ రాష్ట్ర సమితి వర్కింగ్ ప్రెసిడెంట్ కల్వకుంట్ల తారకరామారావు పలు సందర్భాల్లో కొనియాడారు.

ఏమో, రాజకీయాల్లో ఈక్వేషన్స్ ఎప్పుడైనా ఎలాగైనా మారొచ్చు. టీఆర్ఎస్ – జనసేన కలుస్తాయా.? అన్నదీ వేచి చూడాల్సిందే.