Jr Ntr Birthday Specials: జూనియర్ ఎన్టీఆర్.. కేవలం సినిమాల్లోనే కాదు.. రాజకీయాల్లో కూడా సేలబిలిటీ ఉన్న పేరు ఇది. కనిపించే మూడు సింహాలు నటన.. కనిపించని నాలుగో సింహమే రాజకీయం అనేంత క్రేజ్ ఎన్టీఆర్ సొంతం. నందమూరి వంశం, నట వారసత్వం, డైలాగుల్లో స్పష్టత, భారీ ఇమేజ్, తాత ఎన్టీఆర్ తో పోలిక.. ఇవి ఎన్టీఆర్ కు వరాలు. తెరంగేట్రం చేసిన రెండేళ్లలోనే సంచలనాలు నమోదు చేసిన ఎన్టీఆర్.. ప్రత్యక్ష రాజకీయాల్లోకి లేకపోయినా రావాలనే కోరిక సగటు ఎన్టీఆర్ అభిమానిలో ఉంది. రాజకీయాలపై తన సత్తా ఏంటో 2009 ఎన్నికల్లో చూపాడు ఎన్టీఆర్. అప్పటివరకూ స్తబ్దుగా సాగుతున్న ఎన్నికల వేడిని హెలికాఫ్టర్ నుంచి బస్సుపై దిగీదిగడంతో అద్భుతాలు చేశాడు. తన వాగ్దాటితో పలికిన రాజకీయ డైలాగులు సమీప రాజకీయ పార్టీలకు సెగలు పుట్టించాయంటే అతిశయోక్తి కాదు.
తాతకు తగ్గ మనవడిలా..
అప్పటికి 9ఏళ్లుగా అధికారంలో ఉన్న టీడీపీ 2004లో కాంగ్రెస్ గాలిలో ఓటమి చవిచూసింది. వైఎస్ హవాతో ఉన్న రాష్ట్రంలో మళ్లీ ఎన్నికల్లోకి రావాలంటే పార్టీకి సినీ గ్లామర్ అవసరమైంది. దీంతో ఎన్టీఆర్ ను రంగంలోకి దించింది టీడీపీ. 1983లో సీనియర్ ఎన్టీఆర్ ఖాకీ దుస్తుల్లో ఎన్నికల ప్రచారంలోకి దూసుకెళ్లినట్టే ఆయన మనవడు ఎన్టీఆర్ కూడా అదే చేశారు. రాష్ట్రంలో సుడిగాలి పర్యటన చేశారు. టీడీపీకి మళ్లీ ఆశలు చిగురించేలా చేశారు. మొత్తంగా 2009 ఎన్నికల్లో టీడీపీకి వెన్నుదన్నుగా నిలిచాడు ఎన్టీఆర్ . ఫలితాలు తారుమారైనా 2009 ఎన్నికల్లో ఎన్టీఆర్ సృష్టించిన రాజకీయ ప్రభంజనం సగటు తెలుగు ప్రజలు మరిచిపోలేరు. ప్రచారంలో భాగంగా భారీ ప్రమాదానికి గురైనా ఆసుపత్రిలో బెడ్ మీద నుంచే ప్రచారం చేశాడు ఎన్టీఆర్.
భవిష్యత్తులో..
ఆ తర్వాత మారిన అనేక పరిణామాల్లో ఎన్టీఆర్ రాజకీయాలకు దూరంగా ఉన్నారు. 2014, 2019 ఎన్నికల్లో కూడా టీడీపీ తరపున ప్రచారం చేయలేదు. అయితే.. పార్టీకి ఎన్టీఆర్ అవసరం ఉందనే వాదన ఎప్పుడూ వస్తూనే ఉంటుంది. టీడీపీ అధినేత చంద్రబాబునాయుడు ప్రసంగం, పర్యటనల్లో కూడా ఎన్టీఆర్ ఫ్లెక్సీలు, ఆయన్నకలుపుకుని వెళ్లాలనే నినాదాలు హోరెత్తుతూనే ఉంటాయి. ఓదశంలో తెలంగాణలో టీడీపీకి ఎన్టీఆర్ ని అధ్యక్షుడిగా ప్రకటించాలనే నినాదం చంద్రబాబు ముందే వచ్చిందంటే పరిస్థితి అర్ధం చేసుకోవచ్చు. చిన్న వయసులోనే నటనలో ఎంత పరిపక్వత ఉందో.. రాజకీయాల్లో కూడా అంతే పరిపక్వత. ఇప్పటికైతే రాజకీయాలపై కాకుండా.. నటన, సినిమాలపైనే దృష్టి పెడతున్నారు ఎన్టీఆర్. ఎన్టీఆర్ పొలిటికల్ ఎంట్రీ అనేది కాలమే సమాధానం చెప్పాల్సిన అంశం.