జనసేనాని పవన్ కళ్యాణ్ టైమింగ్.. వైసీపీలో షివరింగ్.!

ఓ చిన్న గ్రామంలో అధికార పార్టీ అరాచకంపై గళం విప్పాలంటే ఎంత ధైర్యం కావాలి.? ఎంత తెగువ కావాలి.? కానీ, ఓ గ్రామం అధికార పార్టీపై తిరగబడింది. అదే పశ్చిమగోదావరి జిల్లా భీమవరం నియోజకవర్గంలోని మత్స్యపురి. అధికార పార్టీకి చెందిన ఓ ప్రజా ప్రతినితి పొరుగూళ్ళ నుంచి గూండాల్ని తీసుకొచ్చి, గ్రామంపై దాడి చేశారన్నది ప్రముఖంగా వినిపిస్తోన్న ఆరోపణ. తూచ్, అదెలా జరుగుతుంది.? మేం గాంధేయవాదులం.. అని అధికార పార్టీ అనొచ్చుగాక. గ్రామంలో అధికార పార్టీ ఏ స్థాయిలో అరాచకం సృష్టించకపోతే, ఆ గ్రామం పేరు ఇంతలా మార్మోగిపోతుంది.? రాష్ట్రంలో పంచాయితీ ఎన్నికల వేళ చాలా ప్రలోభాలు నడిచాయి.. బెదిరింపులు చోటు చేసుకున్నాయి. అన్నీ జరిగాకనే, కొన్ని చోట్ల ఎన్నికలు జరగడం చూశాం.

ఈ పరిస్థితుల్లోనూ జనసేన బలపరిచిన ఓ దళిత మహిళ మత్సపురి గ్రామ సర్పంచ్‌గా ఎన్నికవడం అధికార పార్టీకి కంటగింపుగా మారింది. గ్రామంలో అధికార పార్టీ అరాచకం సృష్టించింది. ఈ వ్యవహారంపై జనసైనికులు మండిపడితే, అధికార పార్టీ ఎమ్మెల్యే ఏకంగా జనసేన అధినేత పవన్ కళ్యాణ్‌ని సవాల్ చేశారు. దాంతో సీన్ మారిపోయింది. ‘పిచ్చి కుక్కల్ని మునిసిపాలిటీ వ్యాన్‌లో పడేయాల్సిందే’ అని జనసేనాని పవన్ చెప్పడం సోషల్ మీడియాలో ట్రెండింగ్ అయ్యింది. బోడిలింగం తర్వాత అంతకు మించిన స్థాయిలో ట్రెండింగ్ అయ్యింది ఈ పిచ్చి కుక్క. ఇంకోపక్క, మత్స్యపురి ఘటనతో రాష్ట్ర రాజకీయాల్లో అనూహ్యమైన పరిణామాలు చోటు చేసుకుంటున్నాయి. జనసేన గెలిచిన పంచాయితీల్లో అరాచకాలకు ప్లాన్ చేసిన అధికార పార్టీ మద్దతుదారులు వెనకంజ వేస్తున్నారు.

మత్స్యపురి ఘటనలో ఎమ్మెల్యే తన స్థాయిని అత్యంత పతన స్థాయికి దిగజార్చేసుకున్నారు.. అది వైసీపీకి సైతం తీరని నష్టం కలిగించిందన్న అభిప్రాయం స్థానికంగా వైసీపీ శ్రేణుల్లోనే వినిపిస్తోంది. రాష్ట్ర వ్యాప్తంగా ఎక్కడికక్కడ ఇదే చర్చ జరుగుతోంది. జనసేనాని స్పందించకపోయినా, ఆ స్పందనలో అత్యంత అప్రమత్తత లేకపోయినా.. ఈ స్థాయిలో అధికార పార్టీ అహంకారం నేలమట్టమయ్యేది కాదన్నది రాజకీయ విశ్లేషకలు అభిప్రాయం.