చిరంజీవి బర్త్‌ డే వేడుకల్లో జనసైనికులేం చేశారంటే.!

మెగా ఈవెంట్‌ ఏదైనా, అక్కడ పవన్‌ కళ్యాణ్‌ అభిమానుల సందడి ఎక్కువగా కన్పిస్తుంటుంది. మెగా అభిమానుల్లో మళ్ళీ ఈ పవన్‌ కళ్యాణ్‌ అభిమానుల గోలేంటి.? అంటే, దానికీ ఓ లెక్కుంది. కొన్ని ప్రత్యేక కారణాలతో పవన్‌ కళ్యాణ్‌ అభిమానులు, మెగా ఈవెంట్స్‌లో సందడి చేయడం, అది కొన్నిసార్లు ఆయా ఈవెంట్స్‌ని డిస్టర్బ్‌ చేయడం చూస్తూ వచ్చాం. అయితే, అది కొందరు గిట్టనివారు ‘అభిమానం’ ముసుగులో చేసే అల్లరి మాత్రమేనంటారు చాలామంది. ఆ సంగతి పక్కన పెడితే, మెగాస్టార్‌ చిరంజీవి పుట్టినరోజు వేడుకలు హైద్రాబాద్‌లో అంగరంగ వైభవంగా జరిగాయి.

ఈ ఈవెంట్‌కి పవన్‌ కళ్యాణ్‌ ముఖ్య అతిథిగా హాజరయ్యారు. అల్లు అరవింద్‌, సాయి ధరమ్‌ తేజ్‌ ఈ కార్యక్రమంలో పాల్గొన్నారు. అత్యుత్తమ మార్కులు సాధించిన విద్యార్థులకు ఈ వేదికపై బహుమతుల ప్రదానం జరిగింది. మరోపక్క, చిరంజీవి, పవన్‌ కళ్యాణ్‌, రామ్‌చరణ్‌ నటించిన సినిమాల్లోని పాటలకు డాన్సర్స్‌ వేసిన డాన్సులు స్పెషల్‌ ఎట్రాక్షన్‌గా నిలిచాయి. అవన్నీ ఓ ఎత్తు అయితే, ఈ ఈవెంట్‌లో జనసైనికుల హంగామా ఇంకో ఎత్తు. జనసేన జెండాలు ఆడిటోరియంలో రెపరెపలాడాయి.

జనసేన పార్టీ తరఫున పలువురు ముఖ్య నేతలు ఈ వెంట్‌లో పాల్గొనడం గమనార్హం. జనసేన ఎమ్మెల్యే రాపాక వరప్రసాద్‌, జనసేన నేత తోట చంద్రశేఖర్‌, జనసేన పార్టీ ముఖ్య నేతల్లో ఒకరైన హరిప్రసాద్‌, మెగాస్టార్‌ చిరంజీవి పుట్టినరోజు వేడుకల్లో పవన్‌కళ్యాణ్‌తోపాటు పాల్గొన్నారు. జనసేన నేతలు, జనసేన పార్టీకి జై కొడుతున్న సమయంలో ఆడిటోరియం దద్దరిల్లిపోయింది. ప్రజారాజ్యం పార్టీ నాటి నుంచే మెగా ఫ్యామిలీతో తనకు ప్రత్యేకమైన అనుబంధం ఏర్పడిందని, జనసేనతో తన ప్రయాణం కొనసాగుతుండడం తన అదృష్టంగా భావిస్తున్నాననీ, చిరంజీవి కలలుగన్న సామాజిక న్యాయం కోసమే జనసేన పనిచేస్తోందని తోట చంద్రశేఖర్‌ చెప్పారు.