కేసుల గురించి విజయసాయిరెడ్డి మాట్లాడితే ఎలా.?

మాజీ అసెంబ్లీ స్పీకర్‌ కోడెల శివప్రసాద్‌, అసెంబ్లీకి సంబంధించిన ఫర్నిచర్‌ ‘దొంగిలించారు’ అన్నది వైఎస్సార్‌ కాంగ్రెస్‌ పార్టీ ఆరోపణ. సాక్షాత్తూ మంత్రి కన్నబాబు, ‘దొంగతనం’ ఆరోపణలు చేశాక, ఈపాటికి కోడెల శివప్రసాద్‌పై కేసులు నమోదు చేయడమేంటి.? అరెస్ట్‌ కూడా చేసేసి వుండాలి. కానీ, అలా జరగలేదు. కోడెల కుటుంబ సభ్యుల మీద ఇప్పటికే పలు కేసులు నమోదయ్యాయి.. వివిధ ఆరోపణల కింద.

అసెంబ్లీకి చెందిన ఫర్నిచర్‌ని కోడెల కొట్టేశారని ఆరోపణలు చేయడమంటే చిన్న విషయం కాదు. అసెంబ్లీకి సంబంధించి స్పీకర్‌కి విశేషాధికారాలు వున్నాయి. ఆ సంగతి పక్కన పెడితే, స్పీకర్‌గా తన క్యాంప్‌ కార్యాలయానికి మాత్రమే అసెంబ్లీ ఫర్నిచర్‌ హైద్రాబాద్‌ నుంచి తరలించడం జరిగిందనీ, ఇదంతా రాజధాని తరలింపు వ్యవహారంలో భాగంగా జరిగిందనీ కోడెల శివప్రసాద్‌ అంటున్నారు.

నిజానికి ఇందులో కోడెల శివప్రసాద్‌ని తప్పు పట్టడానికేమీ లేదు. జూన్‌ 7వ తేదీన ఆంధ్రప్రదేశ్‌ అసెంబ్లీ కార్యదర్శికి ఆ ఫర్నిచర్‌ విషయమై లేఖ రాశానని కోడెల అంటున్నారు. ఆ రోజే, ఆ ఫర్నిచర్‌ని స్వాధీనం చేసుకోవడానికి ప్రయత్నించి వుండాలి. రాత్రికి రాత్రి ప్రజా వేదికను కూలగొట్టిన వైఎస్‌ జగన్‌ మోహన్‌రెడ్డి ప్రభుత్వం, అసెంబ్లీ నుంచి దొంగిలించబడుతుందని చెబుతున్న ఫర్నిచర్‌ని ఎందుకు స్వాధీనం చేసుకోలేదన్నది మిలియన్‌ డాలర్ల ప్రశ్న.

ఈ వ్యవహారంపై సోషల్‌ మీడియా వేదికగా విజయసాయిరెడ్డి రెచ్చిపోయారు. కేసులు పెట్టాలి, పార్టీ నుంచి సస్పెండ్‌ చేయాలి.. అంటూ విజయసాయిరెడ్డి సెలవిచ్చారు. కేసులున్నాయనగానే పార్టీ నుంచి సస్పెండ్‌ చేయాల్సి వస్తే, వైఎస్సార్‌ కాంగ్రెస్‌ పార్టీలో విజయసాయిరెడ్డి వుండగలరా.? ఆ మాటకొస్తే ఆ పార్టీ అధినేత వైఎస్‌ జగన్‌, వైఎస్సార్సీపీలో వుండగలరా.? ఏ కేసులు ఎలా నమోదవుతాయో విజయసాయిరెడ్డికి బాగా తెలుసు.

చంద్రబాబు అండ్‌ టీమ్‌ మీద పీకల్లోతు కసితో వున్న వైఎస్‌ జగన్‌ అండ్‌ టీమ్‌, అధికారంలోకి రాగానే, ఏ చిన్న అవకాశం వున్నా.. అందర్నీ లోపలేసేవారే. వెయ్యలేదంటే వైసీపీ, టీడీపీతో కుమ్మక్కయ్యిందనే భావించాల్సి వుంటుంది. ఇటీవల కృష్ణా నదికి వరదలొచ్చాయి.. చంద్రబాబు ఇల్లు మునిగిపోయిందంటూ మంత్రులు నానా యాగీ చేశారు. నిజానికి మునిగింది చంద్రబాబు ఇల్లు కాదు, పేదల ఇళ్ళు. జనం మైండ్‌ని డైవర్ట్‌ చేసే ఈ కుమ్మక్కు రాజకీయాలు ఇంకెన్నాళ్ళు చెల్లుతాయ్‌.?