అరెస్టు కోసం నారా లోకేష్ ఎదురుచూస్తున్నారట.!

తెలుగుదేశం పార్టీ జాతీయ ప్రధాన కార్యదర్శి, మాజీ మంత్రి, ఎమ్మెల్సీ నారా లోకేష్ త్వరలో అరెస్టు కాబోతున్నారట. నారా లోకేష్‌ని ఎలాగైనా అరెస్టు చేయాలని అధికార వైసీపీ భావిస్తోందట. ఇందుకోసం రకరకాల కుట్రలు పన్నుతోందట. ఏ కేసులో ఆయన్ని ఇరికించాలా.? అని వైసీపీ పెద్దలు మల్లగుల్లాలు పడుతున్నారట. సరైన అవకాశం కోసం ప్రభుత్వ పెద్దలు ఎదురుచూస్తున్నారట. ఈ విషయాలన్నీ మాజీ మంత్రి, టీడీపీ సీనియర్ నేత దేవినేని ఉమామహేశ్వరరావు వెల్లడించారు.

ఇటీవల దేవినేని ఉమని ఏపీ పోలీసులు అరెస్ట్ చేయడం, ఆయన్ని జైలుకు తరలించడం, బెయిల్ మీద ఆయన విడుదలవడం తెలిసిన సంగతులే. విడుదలయిన సందర్భంలోనే ఆయన నారా లోకేష్ అరెస్టు గురించి సంచలన వ్యాఖ్యలు చేశారు. మరోపక్క, నారా లోకేష్ ఎప్పటినుంచో ‘అరెస్టు కోసం’ సిద్ధంగా వున్నారు. ‘అరెస్టు చేస్తారా.? దమ్ముంటే చెయ్యండి..’ అంటూ సవాల్ కూడా విసిరేశారు. రాజకీయాల్లో ఇలాంటివన్నీ మామూలే. అరెస్టయితే పొలిటికల్ మైలేజ్ పెరుగుతుందన్నది నేటి రాజకీయ సూత్రం. దాన్నే చాలామంది రాజకీయ నాయకులు ఫాలో అవుతున్నారు కూడా.

ఇక, ఈ వ్యవహారంపై టీడీపీ అనుకూల మీడియా చేస్తున్న రచ్చ అంతా ఇంతా కాదు. నారా లోకేష్, తన అరెస్టు విషయమై తన కుటుంబ సభ్యులందరినీ మానసికంగా సిద్ధం చేస్తున్నారట. ఒక్క దేవాన్ష్ తప్ప.. అందరికీ విషయం చెప్పేశారట. అలాగని టీడీపీ అనుకూల మీడియా ఓ కథనాన్ని వండి వడ్డించింది. ఇదెక్కడి పైత్యం. టీడీపీ అధినేత నారా చంద్రబాబు తనయుడు, టీడీపీ జాతీయ ప్రధాన కార్యదర్శి, మాజీ మంత్రి, ఎమ్మెల్సీ కూడా అయిన నారా లోకేష్‌ని అరెస్టు చేస్తే.. ఆ తర్వాత తలెత్తే రాజకీయ దుమారం గురించి ఎంత చెప్పుకున్నా తక్కువే.

అయితే, తప్పు చేసినప్పుడు ఎవరైనా సరే.. చట్టానికి అతీతులు కారనుకోండి.. అది వేరే సంగతి. కానీ, ఇప్పుడున్న రోజుల్లో చట్టం, న్యాయం గురించి మాట్లాడుకోవడం అనవసరం. రాజకీయ ఒత్తిళ్ళతో పోలీసులు, అయినదానికీ కానిదానికీ.. కేసులు పెట్టి అరెస్టులు చేయడమనేది జరుగుతోందనే ఆవేదన ప్రజాస్వామ్యవాదుల్లో వుంది. ఏమో, ఏం జరుగుతుందోగానీ, నారా లోకేష్ అరెస్టయితే మాత్రం.. రాష్ట్ర రాజకీయాల్లో అదో పెను సంచలనమే అవుతుంది.