కడప ఉక్కుకి రాజకీయ ‘తుప్పు’ వదిలేనా.?’

ఉమ్మడి ఆంధ్రప్రదేశ్‌ని పరిపాలించినవారిలో ఎక్కువమంది రాయలసీమ ప్రాంతానికి చెందినవారే. అందునా, వైఎస్‌ రాజశేఖర్‌రెడ్డి, చంద్రబాబు.. రాయలసీమ ప్రాంతానికి చెందినవారే. కడప జిల్లాకే చెందిన వైఎస్‌ రాజశేఖర్‌రెడ్డి తన హయాంలో కడప ఉక్కు పరిశ్రమకి శంకుస్థాపన చేశారు. ఆ తర్వాత ముఖ్యమంత్రి హోదాలో చంద్రబాబు కూడా కడప ఉక్కు పరిశ్రమకు శంకుస్థాపన చేశారు. తాజాగా, ముఖ్యమంత్రి వైఎస్‌ జగన్‌ మోహన్‌రెడ్డి కూడా ఉక్కు పరిశ్రమకు శంకుస్థాపన చేశారు.

వైఎస్‌ హయాంలో శంకుస్థాపన జరిగితే, ఆ తర్వాత పనులు ప్రారంభమై, పూర్తయిపోవాలి కూడా. ఎవరు అధికారంలో వున్నా కడప ఉక్కు పరిశ్రమ గురించి మాట్లాడటం ఆనవాయితీగా మారిపోయింది. పనులు మాత్రం ఇప్పటిదాకా ఎవరూ పూర్తి చేయలేదు. వైఎస్సార్‌ హయాలో కడప ఉక్కు పేరుతో కర్నాటక మాజీ మంత్రి గాలి జనార్ధన్‌రెడ్డి బాగుపడ్డారు. వైఎస్‌ రాజశేఖర్‌రెడ్డికి అప్పట్లో గాలి జనార్ధన్‌రెడ్డి భారీ స్థాయిలో బహుమతులు ముట్టజెప్పారని ప్రచారం జరిగింది. అదే గాలి జనార్ధన్‌రెడ్డి, వైఎస్‌ జగన్‌ మోహన్‌రెడ్డిని తన సోదరుడిగా చెబుతుంటారు. ఆ వైఎస్‌ జగన్‌ మోహన్‌రెడ్డి, ఇప్పుడు ఆంధ్రప్రదేశ్‌ సీఎం హోదాలో మళ్ళీ కొత్తగా ఉక్కు పరిశ్రమకి శంకుస్థాపన చేశారు.. మూడేళ్ళలో పూర్తి చేస్తామనీ చెబుతున్నారు.

కానీ, కేంద్రం నుంచి నిధులు ఏమైనా వస్తాయా.? ఈ ఉక్కు పరిశ్రమ ఏర్పాటుకు ప్రైవేటు సంస్థలేమైనా ముందుకొచ్చాయా.? అవేమీ జరగకపోతే, రాష్ట్ర ప్రభుత్వం వద్ద ఉక్కు పరిశ్రమను నిర్మించే ఆర్థిక శక్తి వుందా.? అన్న ప్రశ్నలకు మాత్రం అధికార పార్టీ నేతలు సమాధానం చెప్పడంలేదు. ‘మేం అధికారంలోకి వచ్చిన ఆర్నెళ్ళలోనే శంకుస్థాపన చేశాం.. ఇదీ మా చిత్తశుద్ధి..’ అంటూ వైఎస్‌ జగన్‌ మోహన్‌రెడ్డి ప్రకటించేశారు.

శంకుస్థాపన కోసం వెచ్చించిన ఖర్చు దండగ తప్ప, ఉక్కు పరిశ్రమ వచ్చే అవకాశం లేదని కడప జిల్లా వాసులు నిట్టూరుస్తున్నారంటే, పరిస్థితి ఎంత దయనీయంగా వుందో అర్థం చేసుకోవచ్చు. విభజన చట్టంలో కడప ఉక్కు పరిశ్రమ అంశాన్ని ప్రస్తావించారు. ఆ చట్టం ప్రకారం రాష్ట్రానికి హక్కుగా ఉక్కు పరిశ్రమ దక్కాలి. కానీ, కేంద్రాన్ని ఈ విషయమై ప్రశ్నించే చిత్తశుద్ధి లేదు వైఎస్‌ జగన్‌ మోహన్‌రెడ్డికి. సొంత జిల్లాలో ప్రజా వ్యతిరేకత రాకుండా వుండేందుకోసం శంకుస్థాపనని ఓ పబ్లిసిటీ ఈవెంట్‌గా మాత్రమే ఆయన చేపట్టారన్నది నిర్వివాదాంశమిక్కడ. కడప ఉక్కుకి ఈ రాజకీయ పబ్లిసిటీ తుప్పు ఎప్పుడు వదులుతుందో ఏమో.!