బడ్జెట్‌ కెవ్వుకేక.. నిధులు వచ్చేదెలా జగన్‌ సారూ.!

గత బడ్జెట్‌ కంటే ఈసారి బడ్జెట్‌ ఎక్కువ చూపాల్సిందే. అది ఆనవాయితీ. ఇప్పుడు వైఎస్‌ జగన్‌ మోహన్‌ రెడ్డి ప్రభుత్వం కూడా అదే ఆనవాయితీని ఫాలో అయ్యింది. 2 కోట్ల 27 లక్షల 974.99 కోట్ల రూపాయలతో బడ్జెట్‌ అంచనాలతో ఆర్థిక మంత్రి బుగ్గన రాజేంద్రనాథ్‌రెడ్డి ఆంధ్రప్రదేశ్‌ అసెంబ్లీలో రాష్ట్ర బడ్జెట్‌ని ప్రవేశ పెట్టారు. దీన్ని జంబో బడ్జెట్‌ అనో, బాహబలి బడ్జెట్‌ అనో పిలవొచ్చు. ఏ ఏడాదికాయేడాది అంచనాలు పెరిగిపోతుంటాయ్‌.. అది సహజం. కానీ, వచ్చే ఆదాయం సంగతేంటి.? ఇది మాత్రం మిలియన్‌ డాలర్ల ప్రశ్న.

నిజానికి, ఆంధ్రప్రదేశ్‌ అత్యంత దారుణమైన పరిస్థితుల్లో వుంది ఆర్థికంగా. ఉమ్మడి ఆంధ్రప్రదేశ్‌ విభజన కారణంగా ఏర్పడిన నష్టమిది. అప్పటినుంచీ లోటు పెరుగుతూ వస్తోంది. కేంద్రం నుంచి ఆశించిన స్థాయిలో సాయం మాత్రం అందడంలేదు. ఇలాంటి పరిస్థితుల్లోనూ, బడ్జెట్‌ని భలేగా ప్యాక్‌ చేసేసింది వైఎస్‌ జగన్‌ సర్కార్‌. గిఫ్ట్‌ బాక్స్‌ అదిరిపోయింది.. కానీ, అందులో కంటెంట్‌ మాటేమిటి.? విపక్షాల మాటల్లో చెప్పాలంటే, ఇదొక డొల్ల బడ్జెట్‌. విపక్షాలు విమర్శిస్తున్నాయని కాదుగానీ, ఆ విమర్శల్లోనూ నిజం లేకపోలేదు.

ఆంధ్రప్రదేశ్‌కి ఆశించిన స్థాయిలో రాబడి రావడంలేదన్నది నిర్వివాదాంశం. ఆ విషయాన్ని స్వయంగా ముఖ్యమంత్రి వైఎస్‌ జగన్‌ మోహన్‌రెడ్డే పలు సందర్భాల్లో సెలవిచ్చారు. మరి, బడ్జెట్‌ అంచనాల్ని ఇంత ఘనంగా ఎలా ప్రకటించేశారు.? ఇదే మరి, మ్యాజిక్‌ అంటే.!

నవరత్నాలకు సంబంధించి కేటాయింపులు ఘనంగా వున్నాయి. శాఖల వారీగా చూసుకున్నా, కేటాయింపుల పరంగా తప్పు పట్టడానికేమీ లేదు. జేబులో డబ్బులుంటే, దాన్ని ఫలానా విధంగా కర్చు పెట్టవచ్చునని లెక్కలేసుకోవచ్చు. లేని డబ్బులకి లెక్కలేయడమేంటి.? ఇదే ఇక్కడ అసలు సమస్య. వైఎస్‌ జగన్‌ సర్కార్‌ చేస్తోన్నది అదే. ఎన్నికల ప్రచారం సందర్భంగా హామీలు ఇచ్చేశారు.. అవిప్పుడు అమలు చేయాలంటే అంత తేలిక కాదు. కానీ, తప్పదు.. తొలి బడ్జెట్‌తోనే ప్రజల్ని నిరాశపర్చకూడదు. అదే వైఎస్‌ జగన్‌ చేస్తున్నది.

శాఖల వారీగా నిధుల కేటాయింపు అదిరిపోయిందిగానీ.. ఆయా శాఖలకి ఆ నిధులు విడుదల చేయాల్సి వచ్చినప్పుడు అసలు సంగతి బట్టబయలయిపోతుంది. ఏమాటకామాటే చెప్పుకోవాలంటే, కేంద్రాన్ని ‘దేహీ’ అని అడుక్కోవాల్సిన పరిస్థితి ఆంధ్రప్రదేశ్‌ది. అట్నుంచి ఆశించిన స్థాయిలో సాయం లేనప్పుడు, ఈ రెండు కోట్ల పాతిక లక్షల కోట్ల బడ్జెట్‌ ఎవర్ని మోసం చేయడానికి ప్రవేశపెట్టారు వైఎస్‌ జగన్‌ మోహన్‌ రెడ్డిగారూ.!