కెరీర్ ఆరంభంలో సూపర్ స్టార్స్ ఇమేజ్ వాడుకుని.. ఎదిగాక తమ కష్టం వల్లే ఇదంతా.. మా అభిమానుల వల్లే ఇలా.. అనుకునే ఎవరికైనా హీరో నితిన్ చేసిన వ్యాఖ్యలు ఖచ్చితంగా చెంపపెట్టే. ‘అభిమానం వాడుకుని వదిలేసేది కాదు.. నిత్యం చాటుకునేది..’ అని నిరూపించాడు. తన వ్యక్తిత్వాన్ని చాటుకుని ఎందరికో ఆదర్శంగా నిలిచాడు. పవన్ కల్యాణ్ పై తన అభిమానం మారదని.. తన కెరీర్ ఎదుగుదలకు ఉపయోగపడిన ఆ పేరు.. ఇప్పటికీ చెప్పుకోవడం తనకు గౌరవమని చెప్పాడు. రీసెంట్ ఇంటర్వ్యూలో తనకు పవర్ స్టార్ పవన్ కల్యాణ్ పై ఉన్న ఇష్టాన్ని కుండబద్దలు కొట్టి తానేంటో చాటిచెప్పారు. తాను నటించిన ఎక్స్ ట్రా ఆర్డినరీ మేన్ లోని ఓ సన్నివేశంలో పవన్ కల్యాణ్ లా మేకోవర్ ఉండటంపై ఎదురైన ప్రశ్నకు.. ఆయన మాటల్లో..
అదే నాకు గౌరవం..
‘నేను పెద్దగా బ్యాక్ గ్రౌండ్ లేకుండానే వచ్చాను. నాకు పవన్ కల్యాణ్ అంటే చాలా ఇష్టం. కెరీర్ బిగెనింగ్ లోనూ ఇప్పుడూ ఒకటే మాట. నేను పవన్ కల్యాణ్ ఫ్యాన్ ని. చాలామంది హీరోలు పవన్ కల్యాణ్ ఇమేజ్ వాడుకున్నారు. కాకపోతే చెప్పుకోరు. నేను అలా కాదు. ఇప్పుడూ అలానే ఉన్నాను. ఓ రేంజ్ వచ్చాక నేను ఆయన ఫ్యాన్ ని కాదు.. నాకు నేనే అనుకునే క్యారెక్టర్ నాది కాదు. నా సినిమాల్లో ఆయన రిఫరెన్స్ ఉండాలని కోరుకుంటా’నిని తన ఇష్టాన్ని, అభిప్రాయాన్ని చెప్పాడు. నితిన్ మాటలకు పవర్ స్టార్ ఫ్యాన్స్ ఖుషీ అవుతున్నారు. నితిన్ కు పవన్ పై ఉన్న ఇష్టం బాగా తెలిసింది ఇష్క్ సినిమాతో. ఇష్క్ వేడుకకు పవన్ హాజరయ్యారు. నితిన్ కెరీర్ ను ఇష్క్ ముందు-తర్వాతగా చూసేంతగా సక్సెస్ అయింది.
బాధ వచ్చినా తప్పట్లేదు..
ఇక్కడ నితిన్ ను ఖచ్చితంగా అభినందించాలి. కొందరు కెరీర్ ఆరంభంలో సూపర్ స్టార్స్ ఇమేజ్ వాడుకున్నారు. ఆయా హీరోల ఫ్యాన్స్ వీరిని ఆదరించారు. అయితే.. సక్సెస్ రావడం, ఫ్యాన్స్ పెరగడంతో వారిలో మార్పులు వచ్చేసాయి. ‘నావల్లే ఇదంతా.. నాకూ ఫ్యాన్ బేస్ ఉంది.. వారివల్లే ఇలా ఉన్నా’ననే కామెంట్స్ వచ్చేస్తాయి. వీటికి ఆయా స్టార్స్ బాధపడినా.. ఫ్యాన్స్ హర్టయినా సరే పెద్దరికం, మంచితనం అడ్డొస్తుంది. ఎదిగేటప్పుడు ఒదిగి.. ఎదిగాక వినమృతతో ఉండటమే సక్సెస్. వ్యక్తిత్వాన్ని గొప్పగా చాటేది కూడా అదే. కానీ.. ‘గట్టు చేరాక..’ అనే సామెతలా వ్యవహరిస్తే వ్యక్తిత్వానికే కళంకం. ప్రేక్షకులకీ తెలిసినా.. పెరిగిన క్రేజ్, ఇమేజ్ తో అవేమీ ప్రతిబంధకాలు అవ్వవు. అయితే.. ఆత్మవిమర్శ చేసుకుంటే తామేం చేస్తున్నామో ఖచ్చితంగా తెలుస్తుంది.