హత్రాస్ రేప్ కేసు.. యూపీ పోలీసుల తీరుపై తీవ్ర విమర్శలు

ఎక్కడైనా అత్యాచారాలు జరిగితే బాధితుల పేర్లు వెల్లడించకూడదని చట్టం చెప్తోంది. కానీ.. ఉత్తరప్రదేశ్ పోలీసులు అలా చేయకపోవడం ఇప్పుడు తీవ్ర విమర్శలకు దారి తీస్తోంది. ప్రస్తుతం ఉత్తరప్రదేశ్‌లోని హత్రాస్‌ జిల్లాలో జరిగిన అత్యాచార ఘటన దేశంలో అట్టడుకుతోంది. మానవ మృగాల దారుణానికి అన్యాయంగా బలైపోయిన 19 ఏళ్ల దళిత యువతి పేరును ఉత్తరప్రదేశ్ పోలీసులు బహిర్గతం చేశారు.

బాధితురాలు స్వయంగా అనుమతిస్తే తప్ప పేరు బహిర్గతం చేయడానికి వీల్లేదు. బాధితురాలి సమీప బంధువుల అంగీకారం, కేంద్ర లేదా రాష్ట్ర ప్రభుత్వం గుర్తించిన స్వచ్ఛంద సంక్షేమ సంఘం నుంచి అనుమతి తీసుకుంటేనే ఇటువంటి ఘటనల్లో బాధితుల పేర్లు బహిర్గతం చేయాలి. ఆమె మరణించినందునే పేరు వెల్లడించామని అక్కడి పోలీసు వర్గాలు చెప్తున్నా.. ఇది సమర్ధనీయం కాదనే వాదనలు వస్తున్నాయి.

ఉత్తరప్రదేశ్ లో ఠాకూర్లకు పలుకుబడి ఎక్కువ. ఠాకూర్లైన సందీప్, రాము, లవ్‌కుష్, రవి అనే నలుగురు యువకులు తనపై అత్యాచారానికి పాల్పడ్డారని బాధితురాలు వెల్లడించింది. ఆమె దళిత యువతి. హత్రాస్‌ జిల్లాలోని ఛాంద్‌పా ప్రాంతంలోని బూలగార్హిలో ఆమె కుటుంబం నివసిస్తోంది. అంటరానితనం పోకడలు ఇంకా ఉన్న ఆ ఊళ్లో ఠాకూర్లకు, దళితులకు అసలు పడదు. కొద్ది దూరంలోనే వీరి కుటుంబాలు నివసిస్తున్నాయి. ఇరవై ఏళ్ల క్రితం బాధితురాలి తాతను అదే ఠాకూర్‌ కుటుంబం పశువుల కాపలా విషయంలో ఆయన చేతి వేళ్లు నరికేసారని తెలుస్తోంది. అప్పటి నుంచీ వీరి మధ్య వైరం నడుస్తోందని అంటున్నారు.