హరీష్‌ ప్రశ్న: పవన్‌ ఓడినా, ఆయన్ని చూసి డిస్టర్బ్‌ అవుతారెందుకు.?

చాలామంది ఎంపీలు, ఎమ్మెల్యేలు.. వేరే వేరే వ్యాపారాలు నిర్వహిస్తున్నారు. పవన్‌ కళ్యాణ్‌ ఎందుకు సినిమాలు చేయకూడదు.? ఇదీ సినీ దర్శకుడు హరీష్‌ శంకర్‌ సంధించిన ప్రశ్న.

‘పవన్‌ కళ్యాణ్‌ రెండు పోటీ చేసిన రెండు చోట్లా ఓడిపోయారు. నిజానికి ఆయన గెలుపోటములకు అతీతం. ఆయన చూడని గెలుపు వుందా.? ఆయన చూడని డబ్బు వుందా.? రాజకీయాలు వేరు. కానీ, పవన్‌ కళ్యాణ్‌ ప్రజలకు సేవ చేయాలని తపన పడుతున్నారు. సినిమాల్లో వున్నప్పుడే ఆయనకు సమాజం పట్ల ఎంతో బాధ్యత వుండేది. ఆ బాధ్యతతోనే ఆయన తన సినిమాల ద్వారా ఏదో ఒక సందేశం సమాజానికి ఇవ్వాలనుకునేవారు. ఓడిపోయానని పవన్‌ ఎప్పుడూ రాజకీయాల్ని లైట్‌ తీసుకోలేదు. ప్రజలకు సేవ చేయడం కోసమే పరితపిస్తున్నారు..’ అని హరీష్‌ చెప్పుకొచ్చారు.

‘పవన్‌ ఓడిపోయినా, ఆయన మీద అర్థం పర్థం లేని విమర్శలు చేస్తూనే వున్నారు. పవన్‌ని విమర్శిస్తే తప్ప, చాలామందికి వేరే పనిలేనట్లుంది. బహుశా అంతలా పవన్‌ కళ్యాణ్‌ వాళ్ళందర్నీ డిస్టర్బ్‌ చేస్తున్నారేమో. బహుశా అంతలా పవన్‌ని చూసి అంతా డిస్టర్బ్‌ అవుతున్నారంటే.. ఇదే పవన్‌ కళ్యాణ్‌కి సంబంధించి అసలు సిసలు గెలుపు అనుకోవాలేమో..’ అని హరీష్‌ తన తాజా ఇంటర్వ్యూలో చెప్పుకొచ్చారు.

రాజకీయాల గురించి మాట్లాడనంటూనే, ఈ దర్శకుడు పవన్‌ కళ్యాణ్‌పై తనకున్న అభిమానాన్ని చాటుకుంటూ రాజకీయ అంశాల గురించీ ప్రస్తావించడం గమనార్హం. పవన్‌ కళ్యాణ్‌ రాజకీయాల్లో వుండాలి.. అలాగే సినిమాల్లో కొనసాగాలి. ‘మా కోసం సినిమాలు చేయండి.. మా కోసం రాజకీయాలూ చేయండి..’ అని పవన్‌ కళ్యాణ్‌ని మీడియా సాక్షిగా కోరాడు హరీష్‌ శంకర్‌.

ప్రస్తుతం హరీష్‌ శంకర్‌, మైత్రీ మూవీస్‌ బ్యానర్‌లో పవన్‌ కళ్యాణ్‌తో ఓ సినిమా చేయనున్న విషయం విదితమే. ఈ సినిమా అనౌన్స్‌మెంట్‌ గతంలోనే వచ్చింది. తాజాగా ఈ సినిమాకి సంబంధించి మరో ఇంట్రెస్టింగ్‌ అప్‌డేట్‌.. రేపు పవన్‌ పుట్టినరోజు సందర్భంగా ప్రకటించనున్నారు.