మరు జన్మకూ మీ ఆస్తులు బదిలీ చేస్తారంట..!

ఒట్టి చేతులతోనే పుడతాం.. ఒట్టి చేతులతోనే పోతాం.. పోయేటప్పుడు ఎవరూ చిల్లిగవ్వ కూడా మూటగట్టుకుని పోరు.. ఇవీ మానవులకు ఆశ, స్వార్థం ఉండకూడదని సత్పురుషులు చెప్పే మాటలు. కానీ మామూలు జనాలకు ఇవేవీ ఎక్కవు. బతికినంత కాలం దర్జాగా బతకాలి.. బాగా డబ్బు సంపాదించాలి.. తనతోపాటు తరతరాలు కూర్చుని తిన్నా తరిగిపోనంత సొమ్ము ఉండాలని చాలామంది కోరుకుంటారు. చనిపోయేటప్పుడు వెంట తీసుకెళ్లడం కుదరదు కాబట్టి పోతూపోతూ ఒట్టిచేతులతో వెళతారు కానీ.. ఒకవేళ అలాంటి ఏర్పాటు ఉంటే కచ్చితంగా తీసుకెళ్లడానికీ ప్రయత్నిస్తారు.

సరిగ్గా ఇదే పాయింట్ ఆధారంగా ఓ పెద్దాయన మంచి బిజినెస్ మోడల్ ఆలోచించాడు. పెద్ద పెద్ద బిలియనీర్లు లక్ష్యంగా ఓ స్కీమ్ ప్రకటించాడు. ప్రస్తుతం కోటీశ్వరులుగా ఉన్నవారు ఆస్తిలో కొంత భాగాన్ని తమ ట్రస్టుకు ఇస్తే.. వారు చనిపోయిన తర్వాత మళ్లీ ఎక్కడ పుట్టారో కనుక్కుని అప్పుడు ఈ ఆస్తిని తిరిగి ఇస్తారట. ఇందుకోసం కొంత మొత్తాన్ని సర్వీస్ చార్జిగా తీసుకుంటారట. అదిరిపోయింది కదూ ఐడియా? ఇలాంటి స్కీమ్ నెవ్వర్ బిఫోర్.. ఎవ్వర్ ఆఫ్టర్ అనిపిస్తోంది కదూ?

ఇంతకీ ఈ ఐడియా వచ్చింది ఎవరికా అనేగా మీ సందేహం? ఆయన పేరు రాజీవ్ మల్హోత్రా. భారతీయ అమెరికన్ రచయిత.రెండేళ్ల క్రితం ఢిల్లీ జేఎన్టీయూ విజిటింగ్ ప్రొఫెసర్ కూడా. ఫక్తు హిందుత్వవాది అయిన మల్హోత్రాపై బోలెడు ఆరోపణలూ ఉన్నాయి. రచయితే అయినా.. కథలు కాపీ కొడతాడని టాక్. ఇన్ ఫినిటీ ఫౌండేషన్ అనే స్వచ్ఛంద సంస్థ సైతం నిర్వహిస్తున్నాడు. వీడియో లెక్చర్లు ఇస్తుంటాడు. ఇదే తరహాలో తాను రూపొందించిన ‘మరు జన్మకు ఆస్తుల బదిలీ’ కాన్సెప్ట్ ను ఓ వీడియోలో వివరించాడు. ఆగమ శాస్త్రం ప్రకారం ఈ జన్మలో చనిపోయినవారు మరు జన్మలో ఎక్కడ పుడతారో తాము కనుక్కుంటామని.. అనంతరం ఇప్పుడు వారు తమ ట్రస్టులో జమ చేసిన ఆస్తిని ఇచ్చేస్తారట.

‘ప్రస్తుతం బిలియనీర్ అయిన బిల్ గేట్స్ మళ్లీ జన్మలో పేదోడిగా పుట్టొచ్చు. కోట్లకు అధిపతి అయిన వారెన్ బఫెట్ ఏ ఆఫ్రికాలోని మారుమూల గ్రామంలో జన్మించొచ్చు. ఆగమం ఆధారంగా వారు మరు జన్మలో ఎక్కడ పుడతారో కనుక్కుంటాం. ఆ తర్వాత వారి ఆస్తిని ఇచ్చేస్తాం. వాహనంలో జీపీఎస్ పరికరం అమర్చడం ద్వారా అది ఎక్కడ ఉందో గుర్తించినట్టు.. ఈ జన్మలోని జీవాత్మ మరుజన్మలో ఎక్కడ ఉందో తెలుసుకుని ఆ పనిచేస్తాం. బిల్ గేట్స్ 50 మిలియన్ డాలర్లు మా ట్రస్టుకు ఇస్తే.. తదుపరి జన్మలో ఆయన ఎక్కడ పుట్టారో గుర్తించి 5 నుంచి 10 మిలియన్ డాలర్లు ఇస్తాం. అది ఆయనకు సంతోషం కలిగించే విషయమే కదా’ అని ఆ పెద్దాయన మల్హోత్రా సెలవిచ్చారు.

ఇదంతా ఎవరితో చెప్పారో తెలుసా? మన వివాదాస్పద స్వామీజీ, కైలాస దేశపు అధిపతి అయిన నిత్యానందుడితో. ఆయన కూడా ఇదో అద్భుతమైన పథకం అని కొనియాడారు. మరికొంచెం రీసెర్చ్ చేస్తే ఇది సాధ్యమేనని సర్టిఫికెట్ కూడా ఇచ్చారు. కొంతకాలం క్రితం నెట్ లో అప్ లోడ్ చేసిన ఈ వీడియోపై విపరీతంగా సెటైర్లు వెల్లువెత్తాయి. దీంతో ఆ వీడియోను డిలీట్ చేశారు. కానీ అప్పటికే వైరల్ గా మారిన ఈ వీడియో.. మళ్లీ సామాజిక మధ్యమాల్లో చక్కర్లు కొడుతోంది. మల్హోత్రా మామూలోడు కాదు గురూ.. అని సెటైర్లు పడుతున్నాయి. ఇంతకీ ఈ బిజినెస్ ప్రారంభమైందా? ముందు నిత్యానందుడినే జమ చేయమనండి అంటూ నెటిజన్లు ఎద్దేవా చేస్తున్నారు.