బర్త్ డే స్పెషల్: అందుకే.. ‘హరీశ్ శంకర్’ బ్లాక్ బస్టర్ డైరక్టరయ్యాడు

దర్శకుడికి సినిమాను తెరకెక్కించడం ఒక్కటే కాకుండా.. క్యాస్టింగ్, మేకింగ్, సెట్స్, టేకింగ్, స్క్రీన్ ప్లే.. ఇలా చాలా విభాగాల్లో పట్టు సాధిస్తే సినిమాకు ఉపయోగం. దర్శకుడిగా సినిమా తీతలోనే కాదు.. రాతలో కూడా పట్టుంటే సినిమా మరింత కళాత్మకంగా వస్తుందని ఎందరో మేటి దర్శకులు నిరూపించారు. వారి సరసన కూర్చునే అర్హత కలిగిన నేటి జనరేషన్ దర్శకుల్లో ఒకరు ‘హరీశ్ శంకర్’. ఈ పేరు వింటే ఠక్కున గుర్తొచ్చేది పవన్ కల్యాణ్ ‘గబ్బర్ సింగ్’. హరీశ్ శంకర్ లో ఉన్న టాలెంట్ కు ఇదొక ఉదాహరణ. నేడు హరీశ్ శంకర్ పుట్టిన రోజు.

‘గబ్బర్ సింగ్’ టాలీవుడ్ లో భారీ బ్లాక్ బస్టర్. దీంతో హరీశ్ శంకర్ బ్లాక్ బస్టర్ డైరక్టర్ అయిపోయాడు. ఒరిజినల్ దబాంగ్ ను తెలుగు నేటివిటీకి తగ్గట్టు చేసిన మార్పులు ఎవరికైనా ఒక పాఠం. పైన.. చెప్పినట్టు రచనలో దర్శకుడికి పట్టుంటే రిజల్ట్ ఇలానే ఉంటుంది. దబాంగ్ ను తమిళ నేటివిటీకి తగ్గట్టు మార్చకుండా హిందీ కథనే తీసేసరికి అక్కడ ఫ్లాప్ అయింది. ఇక్కడ పవన్ క్రేజ్ కు తగ్గట్టుగా మార్చేసి తన రచన, దర్శకత్వ స్థాయిని చూపాడు. అంత్యాక్షరి సన్నివేశమే ఇందుకు ఉదాహరణ. ఇదొక్కటే కాదు.. దర్శకుడిగా తొలి సినిమా షాక్ కూడా విమర్శకుల ప్రశంసలు పొందింది. స్క్రీన్ ప్లే, దర్శకత్వానికి పేరు వచ్చింది. క్లాసే కాదు.. మాస్ కథాంశాల్ని తీయగలను అని మిరపకాయ్ తో నిరూపించాడు.

గద్దలకొండ గణేశ్ కూడా తమిళ నేటివిటీకి పూర్తిగా మార్పులు చేసి ఇక్కడ హీరోతోనే మెయిన్ క్యారెక్టర్ చేయించి హిట్ కొట్టాడు. సినిమాలో కెమెరా వర్క్ కూడా కొత్తగా కొత్తగా ఉండేలా ప్రోత్సహించి మంచి మార్కులే పట్టేశాడు. సుబ్రమణ్యం ఫర్ సేల్, డీజే.. వంటి హిట్లు కూడా హరీశ్ శంకర్ ఖాతాలో ఉన్నాయి. ఇలా టాలీవుడ సక్సెస్ ఫుల్ డైరక్టర్ గా ఎదిగిన హరీశ్ శంకర్ త్వరలో పవన్ తో మరో సినిమా చేస్తున్నాడు. ఎప్పటికప్పుడు తన హాట్కే ఆలోచనలకి కమర్షియల్ అంశాలను పర్ఫెక్ట్ గా మేళవించి హీరోలను సరికొత్తగా చూపించగలగడంలో ది బెస్ట్ డైరెక్టర్ హరీష్ శంకర్. తన ఫ్యూచర్ ప్రాజెక్ట్స్ కు ఆల్ ది బెస్ట్ చెప్తూ.. జన్మదిన శుభాకాంక్షలు చెప్తోంది ‘తెలుగుబులెటిన్.కామ్’.