రీసెంట్ గా గబ్బర్ సింగ్ 8 ఏళ్ళు పూర్తి చేసుకున్న సందర్భంగా దర్శకుడు హరీష్ శంకర్, ఆ టీమ్ లో పేరుపేరునా అందరినీ గుర్తుచేసుకున్నాడు. తన డైరెక్షన్ టీం, రైటింగ్ టీం, సినిమాటోగ్రాఫర్, సంగీత దర్శకుడు, ఎడిటర్, ఫైట్ మాస్టర్ ఇలా అందరినీ పేరుపేరునా గుర్తుచేసుకున్న హరీష్, సినిమాకు మూలస్థంభమయిన నిర్మాతను పట్టించుకోలేదు. బండ్ల గణేష్ ను కనీసం నామమాత్రానికేనా ప్రస్తావించలేదు. ఇది బండ్ల గణేష్ కు కోపం తెప్పించినట్లుంది.
బండ్ల గణేష్ శైలి గురించి చెప్పేదేముంది. అయితే నెత్తిన పెట్టుకుంటాడు. అలాంటప్పుడు ఈయనగారి పొగడ్తలు భరించలేం. ఆ రేంజ్ లో ఉంటాయి. లేదంటే ఠప్పున కింద పడేస్తాడు. అప్పుడు కూడా భరించలేం. విమర్శలు ఆ రేంజ్ లో ఉంటాయి మరి. హరీష్ శంకర్, బండ్ల గణేష్ మధ్య పూర్తిగా ఎక్కడ చెడిందో తెలీదు కానీ ఒకరు పేరు ప్రస్తావించడానికి ఇష్టపడట్లేదు మరొకరు విమర్శలు ఆపట్లేదు.
ఈ మధ్య ఒక ఇంటర్వ్యూలో బండ్ల గణేష్ మాట్లాడుతూ హరీష్ శంకర్ ను రీమేక్స్ తో కాకుండా స్ట్రైట్ సినిమాతో ఒక హిట్ కొట్టమనండి చూద్దాం. నేను ఇండస్ట్రీని వదిలి వెళ్ళిపోతా అని వ్యాఖ్యానించాడు. నిజానికి హరీష్ శంకర్ రీమేక్స్ చేసింది రెండే. గబ్బర్ సింగ్, గద్దలకొండ గణేష్ చిత్రాలు హిట్స్ అయ్యాయి. కానీ స్ట్రైట్ సినిమాలతో కూడా హరీష్ హిట్స్ అందుకున్నాడు. మిరపకాయ్, సుబ్రహ్మణ్యం ఫర్ సేల్ వంటి సినిమాలు హరీష్ రైటింగ్ నుండి వచ్చినవే. మరి ఈ విషయం బండ్ల గణేష్ కు తెలియదా?