దారుణం: అనాథ బాలికపై ఏడాది పాటు అఘాయిత్యం

అనాథ పిల్లలకు వృధ్దులకు సాయంగా నిలుస్తామంటూ ఎంతో మంది ఆశ్రయాలు పెడుతూ అక్రమాలకు పాల్పడుతున్న సంఘటనలు వస్తూనే ఉన్నాయి. ఎక్కువ మంది వసూళ్లకు పాల్పడి అనాథ పిల్లలకు కనీసం మంచి తిండి పెట్టకుండా ఇబ్బంది పెడుతున్న అనాథ ఆశ్రమ నిర్వాహకులను ఇప్పటి వరకు మనం చాలా మందిని చూశాం. కాని సంగారెడ్డి జిల్లా అమీన్‌పూర్‌ లోని అనాథ ఆశ్రమంలో జరిగిన ఘటన ప్రతి ఒక్కరికి షాకింగ్‌ గా ఉంది. అనాథ ఆశ్రమ నిర్వాహకులు గత ఏడాది పాటు 14 ఏళ్ల బాలికపై లైంగిక దాడి చేయడంతో ఆమె చివరకు మృతి చెందడం రాష్ట్ర వ్యాప్తంగా చర్చనీయాంశం అయ్యింది.

ఆ బాలిక చనిపోయే ముందు తనపై ఏడాదిగా అఘాయిత్యం చేస్తున్నారంటూ వాంగ్మూలం ఇచ్చింది. ఈ విషయాన్ని పటాన్‌ చెర్వు డీఎస్పీ రాజేశ్వరరావు తెలియజేశాడు. ఈ విషయాన్ని ఆశ్రమం నిర్వాహకులు కొట్టి పారేస్తున్నారు. అమ్మాయి మూత్ర సంబంధిత సమస్యతో బాధపడుతుందని దాంతో ఆమెకు ఆపరేషన్‌ చేయించామని అన్నారు. అలాగే ఆమె తలకు గాయం అవ్వడంతో పసుపు పెట్టినట్లుగా పొంతన లేకుండా సమాధానాలు చెప్పారు. దాంతో పోలీసులు కాస్త లోతుగా ఎంక్వౌరీ చేయగా అసలు విషయాలు బయటకు వచ్చాయి.

కరోనా లాక్‌ డౌన్‌ కారణంగా ఆ బాలికను బంధువులు తీసుకు వెళ్లారు. కొన్ని రోజుల తర్వాత ఆమెను మళ్లీ ఆశ్రమంలో జాయిన్‌ చేయాలనుకుంటే నిర్వాహకులు కరోనా కారణంగా వద్దంటూ తిరష్కరించారు. కొన్నాళ్ల తర్వాత మళ్లీ ఆమెను చేర్చుకుంటామని అన్నారు. ఆ బాలికను బంధువులు కూడా కొట్టినట్లుగా పోలీసులు అనుమానిస్తున్నారు. ఇప్పటికే వారిపై కూడా కేసు నమోదు అయ్యింది. ఫార్మా కంపెనీలో ఉద్యోగం చేసే వేణుగోపాల్‌ రెడ్డి అనే వ్యక్తి ఈ ఆశ్రమంను నడిపిస్తున్నాడు. బాలికపై అఘాయిత్యంకు పాల్పడినది కూడా అతడే అంటూ అనుమానాలు వ్యక్తం అవుతున్నాయి.

పోలీసులు ఆశ్రమంను సీజ్‌ చేయడంతో పాటు పోక్సో చట్టం కింద కేసు నమోదు చేశారు. బాలిక మృతిపై రాష్ట్ర బాలల భద్రత కమిటీ నలుగురు సభ్యులతో కూడిన ఉన్నత స్థాయి విచారణ కమిటీని ఏర్పాటు చేయడం జరిగింది. ఈ కమిటీ నిజా నిజాలను గుర్తించనుంది. ఈ కమిటీ నేటి నుండి పోలీసులను బాధితులను మరియు ఆశ్రమ విద్యార్థులను కూడా ప్రశ్నించనున్నారు.