రాజకీయాల్లో శాశ్వత శత్రువులు, శాశ్వత మిత్రులు ఉండరంటారు. నేతలు ఒక పార్టీ నుంచి మరో పార్టీ మారడం కొత్త కాదు. సొంత పార్టీని వదిలి మరో పార్టీలో చేరేటప్పుడు తమ అధినేతపై విమర్శలు చేస్తుంటారు. కానీ తెలుగుదేశం పార్టీ విషయానికి వచ్చేసరికి ఈ విషయంలో కాస్త భిన్నమైన పరిస్థితి కనిపిస్తోంది. ఆదివారం బీజేపీ జాతీయ కార్యనిర్వాహక అధ్యక్షుడు జేపీ నడ్డా సమక్షంలో తెలంగాణ టీడీపీకి చెందిన పలువురు నేతలు కాషాయతీర్థం పుచ్చుకున్నారు. ఈ మొత్తం కార్యక్రమం టీడీపీ నుంచి రాజ్యసభకు ఎన్నికైన గరికపాటి మోహన్ రావు పర్యవేక్షణలో జరిగింది.
నాంపల్లి ఎగ్జిబిషన్ గ్రౌండ్స్ లో భారీ స్థాయిలో ఈ బహిరంగ సభ నిర్వహించడం ద్వారా బీజేపీ పెద్దల దృష్టిలో పడటానికి గరికపాటి ప్రయత్నాలు చేశారు. ఇంతవరకు బాగానే ఉంది. అయితే, వేదికపై ప్రసంగించేటప్పుడు ఆయన భావోద్వేగానికి గురయ్యారు. 37 ఏళ్లపాటు ఉన్న కన్నతల్లి వంటి పార్టీని వీడటం బాధగా ఉందని కంట తడి పెట్టారు. రాష్ట్ర విభజన తర్వాత తెలంగాణలో పార్టీ పరిస్థితి ఎలా మారిందో అందరికీ తెలుసన్నారు. పార్టీ కోసం కష్టపడినవారికి టికెట్లు ఇవ్వలేదని, ఈ విషయాన్ని అధినేత చంద్రబాబు దృష్టికి తీసుకెళ్లడానికి ప్రయత్నించినా కుదరులేదని పేర్కొన్నారు.
రాష్ట్రంలో పార్టీ ఈ పరిస్థితిలో ఉండటానికి చంద్రబాబును తాను ఏమీ అనబోనని, ఆయన బాగుండాలనే కోరుకుంటానని వ్యాఖ్యానించారు. గతంలో పార్టీ మారిన తర్వాత ఎంపీ సుజనా చౌదరి సైతం చంద్రబాబు పై బోలెడు ప్రేమాభిమానాలు కురిపించారు. తాను ఎప్పటికీ ఆయనకు శిష్యుడినే అనే తరహాలో వ్యాఖ్యలు చేశారు. వాస్తవానికి టీడీపీకి గుడ్ బై చెప్పి బీజేపీలో చేరిన తర్వాత ఆ పార్టీ నేతల పట్ల విధేయత కనబరుస్తారు. పాత పార్టీ అధినేతపై అభిమానం ఉన్నప్పటికీ, బహిరంగంగా వ్యక్తంచేయడానికి సాహసించరు. దానివల్ల లేనిపోని సమస్యలు వస్తాయనే ఉద్దేశంతో ఆ పని చేయరు. కానీ ఇక్కడ పరిస్థితి పూర్తి భిన్నంగా కనిపిస్తోంది.
మొన్న సుజనా.. నేడు గరికపాటి తమకు చంద్రబాబుపై ఉన్న అభిమానాన్ని దాచుకోలేకపోయారు. ఈ పరిణామాలన్నీ మరిన్ని అనుమానాలు వ్యక్తం కావడానికి ఆస్కారం కల్పిస్తున్నాయి. చంద్రబాబు ప్రోత్సాహంతోనే ఆయా నేతలు బీజేపీలో చేరారంటూ ప్రత్యర్థులు చేస్తున్న విమర్శలు నిజమనిపించేలా వారి చర్యలు ఉంటున్నాయి. పార్టీ మారినా బాబుపై ప్రేమ కురిపించడానికి కారణం అదేనా అన్నది తేలాల్సి ఉంది.
734230 789906What platform and theme are you making use of if I may ask? Exactly where can I buy them? x 210219