ఆంధ్రప్రదేశ్ రాజకీయాల్లో ‘గాలి’ దుమారం.!

గాలి జనార్ధన్ రెడ్డి.. పరిచయం అక్కర్లేని పేరిది. ఓబుళాపురం అక్రమ మైనింగ్ కేసులో సీబీఐ గతంలో ఆయన్ని అరెస్టు చేస్తే, న్యాయమూర్తిని సైతం ప్రలోభ పెట్టిన ఘనుడాయన. అపర కుబేరుడు.. ఎంతటి వాడినైనా డబ్బుతో కొనేయగల సమర్థత వున్నోడు. పైగా, అన్ని రాజకీయ పార్టీలతోనూ సన్నిహిత సంబంధాలున్నోడు. కర్నాటక రాజకీయాల్లో చక్రం తిప్పి, తెలుగు రాజకీయాల్ని శాసించినోడు.!

ఇంతకన్నా గొప్ప ఎలివేషన్.. బహుశా ‘కేజీఎఫ్’ సినిమాలోనూ లభించదేమో.! అంతటి ఘన చరిత్ర గాలి జనార్ధన్ రెడ్డి సొంతం. మళ్ళీ ఇప్పుడీ గాలి జనార్ధన్ రెడ్డి పేరు మార్మోగిపోతోంది. కారణం, మళ్ళీ గాలి జనార్ధన్ రెడ్డి తన మైనింగ్ కార్యకలాపాల్ని ఆంధ్రప్రదేశ్ రాష్ట్రానికి విస్తరించనున్నాడు. ఈ మేరకు సర్వోన్నత న్యాయస్థానాన్ని ఆశ్రయించాడు. ఇందులో తప్పేముంది.? కోర్టుని కోరాడు గనుక, కోర్టు ఆయనకు గ్రీన్ సిగ్నల్ ఇవ్వొచ్చు.. లేదంటే, రెడ్ సిగ్నల్ కూడా వేయొచ్చు.

కానీ, ఇక్కడ చిత్రమేంటంటే, ఆంధ్రప్రదేశ్ ప్రభుత్వం.. ఈ కేసులో ‘నో అబ్జెక్షన్’ అంటూ గాలి జనార్ధన్ రెడ్డికి అనుకూలంగా స్పందించిందట. ఇందులో తప్పేముంది.? అని ప్రశ్నించేవాళ్ళూ లేకపోలేదు. వైఎస్ రాజశేఖర్ రెడ్డికి అత్యంత సన్నిహితుడీ గాలి జనార్ధన్ రెడ్డి. అప్పట్లో వైఎస్ రాజశేఖర్ రెడ్డికి, ‘బ్రాహ్మణి స్టీల్స్’ వ్యవహారంలో తనకు కలిగిన లబ్ది నేపథ్యంలో అత్యత ఖరీదైన బస్సుని బహూకరించాడాయె.

వైఎస్ రాజశేఖర్ రెడ్డికి తాను దత్త పుత్రుడి లాంటోడిననీ, వైఎస్ జగన్ మోహన్ రెడ్డి తనకు సోదర సమానుడనీ గతంలో స్వయంగా గాలి జనార్ధన్ రెడ్డి చెప్పుకున్నారు. ఆయనకి బీజేపీతో సన్నిహిత సంబందాలున్నాయి, గతంలో ఆయన బీజేపీ తరఫున పని చేశారు కూడా. కీలక పదవులూ నిర్వహించారు.

ఎలా చూసుకున్నా, ఈసారి గాలి జనార్ధన్ రెడ్డికి అడ్డంకులేమీ వున్నట్లుు కనిపించడంలేదు. ఈమాత్రందానికి కేసులు పెట్టడమెందుకు.? సీబీఐ విచారణలెందుకు.? అన్న ప్రశ్న సహజంగానే సామాన్యుల్లో వ్యక్తమవుతుంది. ఇదింతే, ఈ రాజకీయం ఇంతే.!