ఆంధ్రప్రదేశ్ ఆర్థిక క్రమశిక్షణ అంత గొప్పగా వుందా.?

ఉమ్మడి తెలుగు రాష్ట్రం విభజనతో, ఆంధ్రప్రదేశ్ రాష్ట్రానికి ఆర్థిక ఇబ్బందులు వచ్చిన మాట వాస్తవం. కానీ, అదే మాట ఎన్నేళ్ళు చెప్పుకుని రాజకీయంగా పబ్బం గడుపుకుంటారు.? అధికారంలో ఎవరున్నాసరే, పాత పాటే పాడాల్సిందే. అంతే తప్ప, రాష్ట్ర అభివృద్ధి విషయంలో మాత్రం ఎవరూ చిత్తశుద్ధి చూపడంలేదు.

ఆంద్రప్రదేశ్ రాష్ట్రానికి అపారమైన సహజ సంపద వుంది. సుదీర్ఘ తీర ప్రాంతం ఆంధ్రప్రదేశ్ సొంతం. అన్నీ వున్నా అల్లుడి నోట్లో శని.. అన్న చందాన తయారైంది ఆంధ్రప్రదేశ్ పరిస్థితి. రాజధాని వుందో లేదో తెలియదు. వున్నా, దాన్ని అధికార వైసీపీ గుర్తించే పరిస్థితి లేదు. ఇంకోపక్క, ఎప్పటికప్పుడు అప్పులు చేస్తే తప్ప, నెల గడిచే పరిస్థితి లేదు. ఇదెక్కడి దుస్థితి.?

అయినాగానీ, ‘ఆల్ ఈజ్ వెల్..’ అంటోంది ఆంధ్రప్రదేశ్‌లోని అధికార పక్షం. ‘ఆర్థిక పరిస్థితి అస్సలు బాగోలేదు..’ అని అధికార వైసీపీనే చెబుతుంది.. అంతలోనే, ‘భేషుగ్గా ఆర్థిక నిర్వహణ వుంది..’ అని ప్రభుత్వం తరఫున వివరణ వస్తుంటుంది.

గడచిన మూడేళ్ళలో ఆంధ్రప్రదేశ్ రాష్ట్ర కొత్త అప్పులు గణనీయంగా పెరిగిన మాట వాస్తవం. కానీ, ‘పరిమితులకు లోబడే అప్పులు చేశాం..’ అని చెబుతోంది అధికార వైసీపీ. ఆర్థిక మంత్రి బుగ్గన రాజేంద్రనాథ్, ఆంధ్రప్రదేశ్ రాష్ట్ంలో కంటే, ఢిల్లీలో ఎక్కువ వుంటున్నారు.. అప్పుల కోసం ఎక్కే గుమ్మం.. దిగే గుమ్మం.. అన్నట్టు తయారైంది ఆయన పరిస్థితి.

ఇంతా చేసి, రాజధానిని నిర్మించారా.? లేదాయె.! పోనీ, పోలవరం ప్రాజెక్టుని పూర్తి చేశారా.? అదీ లేదు. ఇంతకీ, అప్పులు చేసి ఏం సాధించినట్టు.? ఇంకేం సాధించారు.. సంక్షేమ పాలన చేసేస్తున్నారట. సంక్షేమం కూడు పెట్టదు. సంక్షేమంటే, జనంలోకి డబ్బులు వెళతాయ్.. తిరిగి అవి చేరేవెక్కడికో అందరికీ తెలిసిందే.

రోడ్లను సైతం బాగు చేయలేని దుస్థితి.. అలా రోడ్లను బాగు చేయడానికీ, అప్పులు చేయాల్సిన దుస్థితి. అయినా, ఆంధ్రప్రదేశ్ ఆర్థిక పరిస్థితి భేష్.. అని ఆర్థిక మంత్రి చెబుతున్నారు. నమ్మాల్సిందే, నమ్మి తీరాల్సిందే.!