రైతన్న కష్టం అమ్మకి తెలుసు: జనసేనానికి విరాళమందించిన అంజనాదేవి.!

మాతృదేవోభవ.! అమ్మకంటే ఈ లోకంలో ‘కష్టం’ ఇంకెవరికి తెలుస్తుంది.? కౌలు రైతుల కష్టాలకు చలించిపోయిన జనసేన అధినేత పవన్ కళ్యాణ్, ‘కౌలు రైతు భరోసా’ పేరుతో, అన్నదాతల కుటుంబాలకు సాయమందిస్తున్న సంగతి తెలిసిందే. ఆర్థిక ఇబ్బందులతో ప్రాణాలు కోల్పోయిన కౌలు రైతుల దీనగాధ జనసేనానిని కదిలించింది. వారి కుటుంబాలను ఆదుకునేందుకు నడుం బిగించారు. ఒక్కో కుటుంబానికీ లక్ష రూపాయల ఆర్థిక సాయం చేస్తున్నారు. ఈ సాయంపైనా రాజకీయ ప్రత్యర్థులు తమ దిగజారుడుతనం ప్రదర్శిస్తూ, జనసేనానిపై విమర్శలు చేస్తున్న సంగతి తెలిసిందే.

మెగా కాంపౌండ్ నుంచి వరుణ్ తేజ్, సాయి ధరమ్ తేజ్ తదితరులు ఇప్పటికే జనసేన కౌలు రైతు భరోసా కోసం విరాళాలు అందించగా, తాజాగా జనసేన అధినేత పవన్ కళ్యాణ్ మాతృమూర్తి అంజనాదేవి కూడా తనవంతు సాయంగా లక్షన్నర రూపాయల విరాళం అందించారు.

పవన్ కళ్యాణ్ తండ్రి కొణిదెల వెంకట్రావు, అబ్కారీ శాఖలో ఒకప్పుడు ఉద్యోగం చేశారు. ఆయన మరణానంతరం, పెన్షన్ వస్తూ వుంది. ఆ పెన్షన్ మొత్తాన్ని సేవా కార్యక్రమాల కోసం అంజనా దేవి వినియోగిస్తున్నారు. అలా ఈసారి జనసేన కౌలు రైతు భరోసా కార్యక్రమం కోసం అంజనా దేవి లక్షన్నర రూపాయల్ని విరాళంగా ఇచ్చారు. మరోపక్క, పార్టీ కోసం కూడా లక్ష రూపాయల విరాళం అందించారు అంజనాదేవి.

రాజకీయమంటే దిగజారుడుతనంతో కూడిన విమర్శలేనని అధికార వైసీపీ అనుకుంటోంది. ‘పవన్ కళ్యాణ్, కౌలు రైతులకు భరోసా పేరుతో పబ్లిసిటీ స్టంట్లు చేస్తున్నారు..’ అంటూ దిగజారి విమర్శలు చేస్తున్నారు వైసీపీ నేతలు. నిజానికి, కౌలు రైతుల్ని ఆదుకోవాల్సిన బాధ్యత ప్రభుత్వానిది. ప్రభుత్వం, ప్రభుత్వ ఖజనానా నుంచి సొమ్ములు వెచ్చించి, రైతుల్ని ఆదుకోవాల్సి వుండగా, ఆ బాధత్యని ప్రభుత్వంలో వున్నవారు విస్మరించారు.

ఈ నేపథ్యంలో తన కష్టార్జితం నుంచి కోట్ల రూపాయలు వెచ్చించి మరీ, జనసేన అధినేత పవన్ కళ్యాణ్ ‘జనసేన కౌలు రైతు భరోసా నిధి’ ఏర్పాటు చేశారు. ఈ క్రమంలో జనసైనికులు, పవన్ కళ్యాణ్ అభిమానులు, పవన్ కళ్యాణ్ కుటుంబ సభ్యులు కూడా, ఆ నిధికి విరాళాలు అందిస్తుండడం అభినందించదగ్గ విషయం.

ఏమో, రేప్పొద్దున్న వైసీపీ నుంచి మంత్రులు, ముఖ్య నేతలు.. జనసేన అధినేత పవన్ కళ్యాణ్ మాతృమూర్తి అంజనా దేవి మీద కూడా అడ్డగోలు విమర్శలు చేస్తారేమో.! ఎందుకంటే వాళ్ళకి తెలిసింది అదే కదా.?