నటి ఫిర్యాదు.. మాజీ మంత్రి అరెస్టు

తనతో సహజీవనం చేసి మోసం చేశారంటూ ఓ సినీనటి ఫిర్యాదు చేయడంతో తమిళనాడు మాజీ మంత్రి మణికంఠన్ కటకటాలపాలయ్యారు. గత కొంతకాలంగా తప్పించుకు తిరుగుతున్న ఆయన ఎట్టకేలకు బెంగళూరులో పోలీసులకు చిక్కారు. తమిళ చిత్రపరిశ్రమలకు చెందిన ఓ నటి గతనెల 28న పోలీసులకు ఫిర్యాదు చేశారు. అన్నాడీఎంకే నేత, మాజీ మంత్రి మణికంఠన్ తనను పెళ్లి చేసుకుంటానని నమ్మించి ఐదేళ్లపాటు సహజీవనం చేశారని, రెండు సార్లు గర్భస్రావం కూడా చేయించారని.. ఇప్పుడు తప్పించుకు తిరుగుతున్నారని అందులో పేర్కొన్నారు. ఈ విషయం ఎవరైనా చెబితే తమ వ్యక్తిగత చిత్రాలు నెట్ లో పెడతానని బెదిరిస్తున్నారని ఫిర్యాదులో వివరించారు. దీనిపై రంగంలోకి దిగిన పోలీసులు మణికంఠన్ పై కేసు నమోదు చేశారు. ఈ నేపథ్యంలో తనను అరెస్టు చేయడం ఖాయమని భావించిన మణికంఠన్.. ముందుస్తు బెయిల్ కోసం హైకోర్టును ఆశ్రయించగా.. అక్కడ చుక్కెదురైంది. అప్పటినుంచి తప్పించుకుని తిరుగుతున్న ఆయన బెంగళూరులోని తన స్నేహితుడి ఫామ్ హౌస్ లో ఉన్నారనే సమాచారం తెలియడంతో చెన్నై పోలీసులు శనివారం రాత్రి అక్కడకు వెళ్లి అరెస్టు చేశారు. అనంతరం ఆదివారం మధ్యాహ్నం కోర్టులో హాజరుపరిచి జైలుకు తరలించారు.