మందుబాబుల్లో కరోనా కలవరం

ఇల్లు కాలి ఒకడు ఏడస్తుంటే.. చుట్ట అంటించుకోవడానికి మరొకడు నిప్పడిగాడనేది ఓ సామెత. ప్రస్తుతం మందుబాబు వ్యవహారశైలి చూస్తుంటే ఇది గుర్తుకురాక మానదు. ప్రపంచం మొత్తం కరోనా వైరస్ లో అల్లకల్లోలం అవుతుంటే.. మాకు మందు దొరకడంలేదు బాబోయ్ అని పలువురు ‘టాక్స్ పేయర్స్’ బెంబేలెత్తుతున్నారు. లాక్ డౌన్ నేపథ్యంలో నిత్యావసర వస్తువులు విక్రయించే దుకాణాలు మినహా మిగిలిన అన్ని వ్యాపార, వాణిజ్య సంస్థలను ప్రభుత్వం మూసివేసిన సంగతి తెలిసిందే.

ఈ లాక్ డౌన్ ప్రస్తుతానికి ఏప్రిల్ 14 వరకు కొనసాగనుంది. కోవిడ్ కేసులు పెరిగే నేపథ్యంలో లాక్ డౌన్ ను కూడా సర్కారు పొడిగించే అవకాశం ఉంది. దీంతో ఇది ముగిసేవరకు ఎవరికీ మద్యం దొరికే అవకాశం లేదు. కాస్త డబ్బులున్న వ్యక్తులు తమ పలుకుబడిని ఉపయోగించుకుని ఎక్కువ మొత్తం చెల్లించి తమకు కావాల్సిన మద్యం బాటిళ్లను పొందగలుగుతున్నారు. కానీ సామాన్యులకు ఇది సాధ్యం కాదు. దీంతో గత కొన్ని రోజులుగా వారికి మందు చుక్క లేక నాలుక తడారిపోతోంది.

రోజూ ఠంచనుగా పడే మద్యం ఇప్పుడు గొంతులోకి రాకపోవడంతో పిచ్చి పట్టినట్టు విలవిలాడుతున్నారు. వీరిలో పలువురు ఆల్కహాల్ విత్ డ్రాయల్ అనే రుగ్మతతో బాధపడుతున్నారని నిపుణులు చెబుతున్నారు. రోజూ తాగే మద్యం ఒక్కసారిగా దొరకపోవడంతో వీరి శరీరంలో పలు మార్పులు కనిపిస్తాయని అంటున్నారు.

ముఖ్యంగా పలువురికి కాళ్లూ చేతులు వణకడం, వికారం, వాంతులు, నిద్రలేమి, అలసట, ఆందోళన, అయోమయానికి గురికావడం వంటి లక్షణాలు ఉంటాయని వివరిస్తున్నారు. ఇలాంటివారిని జాగ్రత్తగా చూసుకోవాలని సూచిస్తున్నారు. ఇప్పటికే తెలంగాణలో మద్యం దొరక్క ఒక వ్యక్తి ఆత్మహత్య చేసుకోవడం కలకలం సృష్టించింది. దీంతో మందుబాటులను వారి కుటుంబ సభ్యులు ఓ కంట కనిపెట్టి ఉండటం మంచిదని చెబుతున్నారు.