ఇంజెక్షన్ తో వ్యక్తి హత్య కేసు..! విస్తుపోయే విషయాలు తెలిపిన పోలీసులు

భర్త మరణ శాసనాన్ని భార్యే రాసింది. తన వివాహేతర సంబంధానికి అడ్డొస్తున్నాడని పథకం ప్రకారం ప్రియుడితో కలిసి భర్తను కడ తేర్చింది. బైక్ లిఫ్ట్ అడిగి.. ఇంజెక్షన్ ఇచ్చి హత్య చేసిన సంచలన హత్య కేసును పోలీసులు చేధించారు. పక్కా ప్లాన్ ప్రకారమే భర్తను ప్రియుడితో చేయించింది. హత్యకు కారకులైన ఆరుగురిని పోలీసులు అదుపులోకి తీసుకున్నారు. ఖమ్మం ఏసీపీ బస్వారెడ్డి కేసు వివరాలను వెల్లడించారు.

చింతకాని మండలం బొప్పారం గ్రామానికి చెందిన షేక్ జమాల్ సాహెబ్, ఇమామ్ బీ భార్యాభర్తలు. అదే గ్రామానికి చెందిన ఆటో డ్రైవర్ మోహన్ రావుతో ఇమామ్ బీకి అక్రమ సంబంధం ఏర్పడింది. కూలీల మేస్త్రి అయిన ఇమామ్ బీ కూలీలను తీసుకెళ్లేందుకు మోహన్ రావుతో మాట్లాడుతూండేది. ఇదే వారిద్దరి మధ్యా వివాహేతర సంబంధానికి దారి తీసింది. ఓరోజు.. మోహన్ రావు, ఇమామ్ బీ ఇంట్లో ఉండగా చూసిన జమాల్ భార్యపై చేయి చేసుకున్నాడు. దీంతో తమ సంబంధానికి అడ్డొస్తున్నాడని జమాల్ ను హత్య చేయాలని భావించారు ఇద్దరు. దీంతో నామవరానికి చెందిన ఆర్ఎంపీ వైద్యుడు వెంకన్నను సంప్రదించి మనిషిని చంపే ఇంజెక్షన్ ఇవ్వాలని 5వేలు ఇచ్చాడు.

తన స్నేహితుడైన యశ్వంత్.. తన మిత్రుడైన సాంబశివరావుతో రెండు నియో వాక్ ఇంజెక్షన్లు తెప్పించాడు. మరో ఆటో డ్రైవర్ వెంకటేశ్ తో ఇంజెక్షన్లను ఇమామ్ బీకి చేర్చాడు. భర్తను హత్య చేసేందుకు విఫలయత్నం చేసిన ఇమామ్ బీ కుదరక అవే ఇంజక్షన్లను వెంకటేశ్ ద్వారా మోహన్ రావుకే పంపించింది. దీంతో సమయం కోసం ఎదురుచూసి.. సెప్టెంబర్ 19న జమాల్ ఏపీలోని గండ్రాయిలో ఉంటున్న తమ కూతురి ఇంటికి వెళ్తున్న భర్త సమాచారాన్ని మోహన్ రావుకు ఫోన్లో తెలిపింది. మోహన్ రావు, వెంకన్న, వెంకటేశ్ రెండు బైక్ లపై వల్లభి వెళ్లారు. అక్కడ జామాల్ ను లిఫ్ట్ అడిగిన వెంకన్న ఇంజెక్షన్ ఇచ్చి పారిపోయాడు. దీంతో జమాల్ మృతి చెందాడు.

జమాల్ కంటే ముందు అదే మార్గంలో బైక్ పై వస్తున్న గుంజి మైసయ్య అనే వ్యక్తిని చొక్కా పోలికతో ఆపారు. అయితే.. అతడు జమాల్ కాదని విడిచిపెట్టారు. కేసులో ఏ1 గా మోహన్ రావు, ఏ2గా ఆర్ఎంపీ వైద్యుడు బండి వెంకన్న, ఏ3గా వెంకటేశ్, ఏ4గా ఇమామ్ బీ, ఏ5గా యశ్వంత్, ఏ6గా సాంబశివరావును చేర్చారు. వీరందరినీ అరెస్టు చేశామని.. కోర్టులో హాజరుపరుస్తామని ఏసీపీ వెల్లడించారు.