సీపీఎస్ రద్దు: డబ్బుల్లేవ్.. మేమేటి సేత్తాం.!

ఎన్నికల సందర్భంగా హామీలు ఇచ్చి, ఆ తర్వాత మాట తప్పాల్సి వస్తే.. పదవికి రాజీనామా చేసి ఇంటికెళ్ళిపోవాలని చెప్పింది స్వయానా వైఎస్ జగన్ మోహన్ రెడ్డిగారే. అది ప్రతిపక్ష నేతగా వున్నప్పటి మాట. అధికార పీఠమెక్కాక మాత్రం మాట తప్పేశారు. సీపీఎస్ రద్దు విషయంలో, ‘అధికారంలోకి వచ్చాక వారం రోజుల్లోనే చేసేస్తాం..’ అని హామీ ఇచ్చిన వైఎస్ జగన్, అధికారంలోకి వచ్చాక మూడేళ్ళయినా.. ఆ పని చేయలేదు సరికదా, ‘అప్పుడేదో తెలియక చెప్పేశాం.. ఇప్పుడు చేయలేం..’ అంటున్నారు.

‘మేం చేయగలిగే పరిస్థితి వుంటే చేసేవాళ్ళం.. రాష్ట్ర ఆర్థిక పరిస్థితిని దృష్టిలో పెట్టకుని చేయలేకపోతున్నాం.. ఉద్యోగులు అర్థం చేసుకోవాలి..’ అంటూ వైసీపీ ముఖ్య నేత, ప్రభుత్వ సలహాదారు సజ్జల రామకృష్ణారెడ్డి సీపీఎస్ రద్దు వ్యవహారంపై తాజాగా వ్యాఖ్యానించారు. ‘అప్పట్లో అవగాహన లేకుండా హామీ ఇచ్చారు..’ అంటూ సీపీఎస్ మీద తొలుత బాంబు పేల్చింది సజ్జల రామకృష్ణారెడ్డి అని ప్రత్యేకంగా చెప్పాల్సిన పనిలేదు కదా.!

అదేంటో, ఉద్యోగులకు ఇచ్చిన హామీని నిలబెట్టుకునే విషయంలోనే రాష్ట్రానికి వున్న ఆర్థిక ఇబ్బందులు ప్రభుత్వ పెద్దలకు గుర్తుకొస్తున్నాయ్. అప్పులు చేసి సంక్షేమ పథకాలు అమలు చేస్తున్నప్పుడేమో ఆర్థిక ఇబ్బందులు గుర్తుకు రావడంలేదాయె.!

ఎడా పెడా సలహదారుల్ని నియమించుకున్నాక, వారికి గౌరవ వేతనాలతోపాటు సకల సౌకర్యాలూ కల్పించేందుకు పెద్దయెత్తున నిధులు ఖర్చు చేసినప్పుడు మాత్రం రాష్ట్ర ఆర్థిక ఇబ్బందులు వైసీపీ అధినాయకత్వానికీ, ప్రభుత్వ పెద్దలకూ గుర్తుకు రాలేదాయె. సంక్షేమ పథకాలకు ప్రభుత్వం తరఫున ప్రచారం నిమిత్తం చేసే ఖర్చు విషయంలో కూడా రాష్ట్ర ఆర్థిక పరిస్థితి ప్రభుత్వంలో వున్నవారికి గుర్తుకు రాకపోవడం శోచనీయమే.!

కేవలం, ఉద్యోగుల దగ్గరకు వచ్చేసరికి.. అందునా సీపీఎస్ రద్దు దగ్గరకు వచ్చేసరికి మాత్రమే రాష్ట్ర ఆర్థిక పరిస్థితులు ప్రభుత్వ పెద్దలకు ఒకింత గుర్తుకొచ్చేస్తున్నాయ్.. ఈ ఒక్క విషయంలోనే ప్రభుత్వం బాధ్యతగా వ్యవహరించేస్తోందని ఉద్యోగులు వాపోతున్నారు.

ప్రభుత్వ ప్రకటనల పేరుతో సొంత మీడియా సంస్థలకు చేస్తున్న మేలుని రాష్ట్ర ఆర్థిక ఇబ్బందుల కారణంగా ఆపగలరా.? అన్నది ప్రభుత్వ ఉద్యోగుల ప్రశ్న. తూచ్.. అలాంటి ప్రశ్నలు ఉద్యోగులెవరూ వెయ్యకూడదు.. అది ప్రభుత్వ వ్యతిరేక చర్య అవుతుంది.!