ఎయిర్ షీల్డ్: విమానంలో వైరస్ వ్యాప్తిని అడ్డుకుంటుందా?

ప్రపంచంలో గతంలో ఎప్పుడూ చూడని విచిత్ర పరిస్థితులు ఇప్పుడు నెలకొన్నాయి. కరోనా మహమ్మారి కారణంగా ఎక్కడికి వెళ్లాలన్నా భయమే.. ఏది ముట్టుకోవాలన్నా సంకోచమే. ప్రధానంగా ఇది ప్రయాణాలపై పెను ప్రభావం చూపిస్తోంది. ఈ క్రమంలోనే ప్రజా రవాణా వ్యవస్థకు సంబంధించి కొన్ని మార్పులు కూడా చోటుచేసుకుంటున్నాయి. ప్రయాణికుల మధ్య దూరం ఉండేలా పరిమిత స్థాయిలోనే రైళ్లు, బస్సుల్లో వారిని అనుమతిస్తున్నారు. ఈ పరిస్థితుల్లో విమానాలకూ సమస్య తప్పడంలేదు.

మనదేశంలో ఇప్పటికే దేశీయ రూట్లలో విమానాలు నడుస్తుండగా.. త్వరలోనే అంతర్జాతీయ సర్వీసులు కూడా ప్రారంభం కానున్నాయి. విమానాల్లో కూడా భౌతికదూరం పాటించే విధంగా ఏర్పాట్లు ఉండాలని, పరిమిత సంఖ్యలోనే ప్రయాణికులను అనుమతించాలని చేసిన సూచనలు విమానయాన సంస్థలకు ఇబ్బందిగా మారాయి. ఇప్పటికే నష్టాల్లో కొట్టుమిట్టాడుతున్న తమకు ఇది మరింత దెబ్బ తీస్తుందని పలు సంస్థలు ఆవేదన వ్యక్తంచేశాయి. ఈ నేపథ్యంలో ఇందుకు ప్రత్నమ్నాయ మార్గాలు అన్వేషించాయి.

ఈ తరుణంలో సీటెల్ కు చెందిన టీగ్యూ అనే సంస్థ ఎయిర్ షీల్డ్ అనే వినూత్న పరికరాన్ని అభివృద్ధి చేసింది. త్రీడీ టెక్నాలజీతో రూపొందించిన ఈ పరికరాన్ని విమానం కేబిన్లో ప్రయాణికుల సీట్లపై గాలి వచ్చేచోట అమరిస్తే సరిపోతుంది. అందులో నుంచి వచ్చే గాలి ఆ సీట్లో కూర్చున్న ప్రయాణికుడి చుట్టూ వలయంలా ఏర్పడుతుంది. ఫలితంగా అతడి నుంచి వచ్చే గాలి లేదా తుంపర్లు పక్క సీటులో కూర్చున్న ప్రయాణికుడికి వెళ్లవు. అలాగే పక్క సీటులో కూర్చున్న ప్రయాణికుడి నుంచి ఎలాంటి గాలి లోపలకు రాదు. అంటే కంటికి కనిపించని రక్షణ కవచంలా ఇది పనిచేస్తుందన్నమాట.

తద్వారా ఒకరి నంచి మరొకరికి ఎలాంటి ఇన్ ఫెక్షన్ వ్యాపించకుండా చేస్తుందని దీని రూపకర్తలు చెబుతున్నారు. విమానంలో ఆక్సిజన్ అందించే వ్యవస్థను ఇది మరింత మెరుగుపరుస్తుందని, తద్వారా ప్రయాణికులు సురక్షితంగా ఉంటారని టెగ్యూ సీనియర్ డైరెక్టర్ ఆంథోని హర్కప్ వెల్లడించారు. ఇటీవలే ఎయిర్ షీల్డ్ కు సంబంధించిన పేటెంట్ కూడా వచ్చిందని, త్వరలోనే వాణిజ్యపరమైన కార్యకలాపాలు ప్రారంభిస్తామని పేర్కొన్నారు.