కరోనా ఉగ్రరూపం.. ఒక్కరోజే లక్షన్నర కేసులు

ప్రపంచాన్ని అతలాకుతలం చేస్తున్న కరోనా మహమ్మారి ఉగ్రరూపం దాల్చింది. శుక్రవారం ఒక్కరోజులో ప్రపంచవ్యాప్తంగా ఏకంగా లక్షన్నర కేసులు నమోదు కావడం కలకలం సృష్టిస్తోంది. ఇప్పటివరకు ఒక్కరోజులో నమోదైన కేసుల్లో ఇదే అత్యధికం. దీంతో ప్రపంచం మరింత ప్రమాదకర దశలోకి వెళ్లిపోతోందనే ఆందోళన వ్యక్తమవుతోంది. చాలా దేశాల్లో లాక్ డౌన్ ఎత్తివేయడం.. ప్రజలు సరైన జాగ్రత్తలు పాటించకపోవడంతోనే కరోనా మహమ్మారి విజృంభిస్తోందనే అభిప్రాయాలు వ్యక్తమవుతున్నాయి.

ఈ విషయంలో ప్రపంచ ఆరోగ్య సంస్థ తాజాగా హెచ్చరికలు జారీచేసింది. గతంలో ఎన్నడూ లేనంత అత్యంత గడ్డు దశ ప్రారంభమైందని, చాలా జాగ్రత్తగా ఉండాలని డబ్ల్యూహెచ్ఓ చీఫ్ టెడ్రస్ అథనోమ్ పేర్కొన్నారు. ‘‘ప్రస్తుతం ప్రపంచం అత్యంత ప్రమాదకరమైన కొత్త దశలోకి వెళ్లింది. 24 గంటల్లో ఏకంగా లక్షన్నర కేసులు నమోదయ్యాయి. వీటిలో ఎక్కువ కేసులు రెండు అమెరికా ఖండాలు, దక్షిణాసియ, మధ్యప్రాచ్చ దేశాల్లోనే ఉన్నాయి. దీనిని అడ్డుకోవడానికి నిబంధనలు కఠినతరం చేయడం తప్ప మరో మార్గం లేదు’’ అని ఆయన స్పష్టంచేశారు.

ప్రస్తుతం ప్రపంచవ్యాప్తం కరోనా కేసుల సంఖ్య 87,77,245 ఉండగా.. ఇప్పటివరకు 4,62,918 మంది మరణించారు. అమెరికాలో ఆ సంఖ్య 23 లక్షలను సమీపిస్తుండగా.. భారత్ లో అది 4 లక్షలకు చేరుతోంది. గణాంకాలను పరిశీలిస్తే లాక్ డౌన్ ఎత్తివేసిన దేశాల్లో కేసుల సంఖ్య కూడా పెరుగుతోందని తెలుస్తోంది. ఈ విషయంపై డబ్ల్యూహెచ్ఓ గతంలోనే హెచ్చరించినా.. ఆర్థిక వ్యవస్థ దిగజారిపోతుండటంతో చాలాదేశాలు తప్పనిసరి పరిస్థితుల్లో లాక్ డౌన్ ఆంక్షల్లో సడలింపులు ఇచ్చారు. వైరస్ వ్యాప్తి విస్తృతం కావడానికి ఇదో కారణమైంది. తెలుగు రాష్ట్రాల్లో కూడా ఈ కేసుల సంఖ్య గణనీయంగా పెరిగింది. గత రెండు రోజులుగా రోజుకు 400కి పైగా కేసులు నమోదవుతున్నాయి. తెలంగాణలో మూడు రోజుల్లోనే వెయ్యి కేసులు నమోదు కావడం కలకలం రేపుతోంది. ఈ నేపథ్యంలో కోవిడ్ నిబంధనలు పాటిస్తూ ఎవరికి వారు జాగ్రత్తలు తీసుకోవాల్సిందేనని సూచిస్తున్నారు.