హీరోకు ఎన్ని హిట్స్ ఉంటే అంత పాపులారిటీ పెరుగుతుంది. వరుస హిట్స్ ఉంటే రేంజ్ పెరుగుతుంది. మెగాస్టార్ చిరంజీవి కెరీర్ గ్రాఫ్ కూడా అలా వెళ్లిందే. హీరో ఎవరైనా ఓ బ్లాక్ బస్టర్ ఇస్తే.. ఆ వెంటనే వచ్చే సినిమాపై అంచనాలు పెరిగిపోతాయి. దానిని క్యారీ చేయడం వారికి సవాలే అవుతుంది. వెంటనే ఆ స్థాయి హిట్ ఇవ్వడం చాలా కష్టం. కానీ.. చిరంజీవి దీనిని చాలాసార్లు సాధించారు. ఆయనకు మాస్ ఇమేజ్ వచ్చే ముందు భారీ ఫ్యామిలీ ఇమేజ్ ఇచ్చిన ‘ఇంట్లో రామయ్య వీధిలో కృష్ణయ్య’ తర్వాత మళ్లీ ఫ్యామిలీ మూవీ చేసి అదేస్థాయి హిట్ అందుకున్నారు.. ప్రేక్షకులకు మరింత చేరువయ్యారు. ఆ సినిమానే ‘శుభలేఖ’. ఈ సినిమా చిరంజీవి కెరీర్ లో చాలా ప్రత్యేకమైనదని చెప్పాలి.
చిరంజీవిని తమవాడిగా..
కుటుంబం, సంసారం నేపథ్యంలో ‘ఇంట్లో రామయ్య వీధిలో కృష్ణయ్య’ చేస్తే.. కుటుంబంలో ఆడపిల్ల పెళ్లి, వరకట్నం, వితంతు వివాహం అనే అంశాలపై ‘శుభలేఖ’ చేశారు. అప్పట్లో ఈ సినిమా చేయడం సాహసమే. డిగ్నిటీ ఆఫ్ లేబర్ అంటూ హోటల్ లో సర్వర్ గా చేయడం అప్పట్లో యువతపై ఎంతో ప్రభావం చూపింది. కట్నం సమస్యపై సినిమాలో చూపడం సమాజంలో ప్రేరణ ఇచ్చింది. వితంతు వివాహాంపై ప్రస్తావన మార్పు ఎంత ఆవశ్యకమో చెప్పింది. చలాకీ కుర్రాడిగా మూర్తి పాత్రలో చిరంజీవి ఒదిగిపోయారు. కుటుంబ ప్రేక్షకులకి ఈ సినిమా ఒక మార్పు, ఆలోచన అయింది. మూర్తి పాత్రలో చిరంజీవిని ప్రేక్షకులు తమ ఇంట్లో వ్యక్తిగా చూశారు. దీంతో సినిమా అద్భుత విజయం సాధించింది.
సినిమాలో ప్రత్యేకత అదే..
కళాతపస్వి కె.విశ్వనాధ్ దర్శకత్వంలో తెరకెక్కిన ఈ సినిమాను ప్రశాంతి క్రియేషన్స్ బ్యానర్ పై అల్లు అరవింద్, వి.వి.శాస్త్రి నిర్మించారు. ‘ఇంట్లో రామయ్య వీధిలో కృష్ణయ్య’కు మాటలు రాసిన గొల్లపూడి మారుతీరావు ఈ సినిమాకూ మాటలు రాసారు. సినిమా కథాంశం తమ కుటుంబ కథలా, పాత్రలు తమ కుటుంబసభ్యుల్లా ఫీల్ కావడమే ఈ సినిమా ప్రత్యేకత. ప్రముఖ దర్శకుడు కృష్ణవంశీ తన స్నేహితులతో కలిసి ఈ సినిమా సెకండ్ షో చూసి తెల్లవార్లూ ఈ సినిమాపై చర్చ జరిపారట. ఆ తర్వాత తాము పెళ్లి చేసుకుంటే కట్నం తీసుకోకూడదనే నిర్ణయానికి వచ్చినట్టు ఓ ఇంటర్వ్యూలో చెప్పుకొచ్చారు. అంత ఇంపాక్ట్ ఈ సినిమా సమాజంపై చూపింది.
చిరంజీవికి తొలి ఫిలింఫేర్..
చిరంజీవి నటనకు ప్రేక్షకులు ఫిదా అయిపోయారు. వెంట వెంటనే రెండు ఫ్యామిలీ సినిమాలు చేసి ప్రేక్షకులను మెప్పించారు చిరంజీవి. అప్పటికి చిరంజీవికి మాస్ ఇమేజ్ రాకపోవడం చాలా ప్లస్ అని చెప్పాలి. చిరంజీవి ద్వారా ఈ సినిమా ప్రేక్షకుల్లోకి అంతగా వెళ్లడమే ఇందుకు నిదర్శనం. 1982 జూన్ 11న విడుదలైన ఈ సినిమా సంచలన విజయం సాధించింది. ‘ఇంట్లో రామయ్య వీధిలో కృష్ణయ్య’ విడుదలైన 5వారాల వ్యవధిలో విడుదలైన ‘శుభలేఖ’ అంతే విజయం సాధించింది. చిరంజీవి అద్భుత నటనకు ఆయన కెరీర్లో తొలి ఫిలింఫేర్ అవార్డు తెచ్చిపెట్టింది. ‘శుభలేఖ’ సినిమా నా జీవితానికి ఎంతో మేలు చేసిందని చిరంజీవి అనేక సందర్భాల్లో చెప్పారు.