6 రూపాయల చీప్ లిక్కర్ 250 రూపాయలకు విక్రయిస్తున్నారా.?

చీప్ లిక్కర్ వ్యవహారాన్ని అస్సలేమాత్రం తేలిగ్గా వదిలేసేలా లేరు ఆంధ్రప్రదేశ్ బీజేపీ అధ్యక్షుడు సోము వీర్రాజు. ‘నేను మద్యపానాన్ని సమర్థించను. అలాగని, మద్య నియంత్రణ, నిషేధం పేరుతో మద్యపానప్రియుల్ని దోచేస్తోంటే ఊరుకునే ప్రసక్తే లేదు. ఆరు రూపాయల విలువ చేసే చీప్ లిక్కర్‌ని రెండు వందల యాభై రూపాయలకు అమ్మి మోసం చేస్తారా.? ప్రభుత్వం ఇలాగేనా వ్యవహరించేది.?’ అంటూ సోము వీర్రాజు విరుచుకుపడ్డారు.

నిజమేనా.? బాటిల్‌తో కలిపి చీప్ లిక్కర్ ఖరీదు ఆరు రూపాయలేనా.? ఆరు రూపాయల విలువైన చీప్ లిక్కర్‌ని రెండు వందల యాభై రూపాయలకు అమ్ముతున్నారా.? ఈ విషయమై చర్చ జరిగి తీరాల్సిందే. ఎందుకంటే, మద్యం అమ్మకాల పేరుతో సామాన్యుడ్ని ప్రభుత్వం దోచేయడం అస్సలేమాత్రం సమర్థనీయం కాదు.

ఒకప్పుడు ప్రైవేటు వ్యక్తులు మద్యం దుకాణాల్ని నిర్వహించేవారు. వారికి ప్రభుత్వం లైసెన్సులు ఇచ్చేది. కానీ, ఆంధ్రప్రదేశ్ రాష్ట్రంలో ప్రభుత్వమే మద్యం దుకాణాల్ని నిర్వహిస్తోంది. అంటే, లాభాలన్నీ ప్రభుత్వం జేబుల్లోకి వెళుతున్నాయా.? ప్రభుత్వం నడుపుతున్న పెద్దల జేబుల్లోకి వెళుతున్నాయా.? అన్న ప్రశ్నలు తెరపైకి రాకుండా ఎలా వుంటాయి.?

సోము వీర్రాజుకి ఈ చీప్ లిక్కర్ విషయమై అంత చిత్తశుద్ధి వుంటే, ప్రధాని నరేంద్ర మోడీ దగ్గరకు గానీ లేదా కేంద్ర హోం శాఖ మంత్రి దగ్గరకు గానీ వెళ్ళి సీబీఐ విచారణ చేయిస్తే సరి. పైగా, సోము వీర్రాజు నేరుగా ప్రభుత్వ పెద్దల మీదనే ఆరోపణలు చేస్తున్నారాయె. అర్థం పర్థం లేని బ్రాండ్ల పేరుతో ప్రభుత్వ పెద్దలకు చెందిన కంపెనీలే దోపిడీకి పాల్పడుతున్నాయన్నది సోము వీర్రాజు సహా బీజేపీ నేతలందరి వాదన.

చీప్ లిక్కర్ విషయమై దుమారం రేగుతున్న సమయంలో జిన్నా సెంటర్ వివాదాన్ని తెరపైకి తెచ్చారుగానీ, ఆ చీప్ లిక్కర్ విషయమై కేంద్ర ప్రభుత్వ పెద్దల్ని కలిసి, రాష్ట్ర ప్రభుత్వ పెద్దలపై ఫిర్యాదు చేసి వుంటే, ఏపీ బీజేపీ చిత్తశుద్ధి బయటపడేది.