అచ్చెన్నతో టీడీపీ అధినేత చంద్రబాబు దాగుడు మూతలు

మాజీ మంత్రి, టీడీపీ సీనియర్‌ నేత అచ్చెన్నాయుడు.. ఆంధ్రప్రదేశ్‌ టీడీపీ శాఖకు అధ్యక్షుడు కాబోతున్నారన్న ప్రచారం ‘కరోనా’కి ముందు నుంచే వినిపిస్తోంది. 2014 ఎన్నికల తర్వాత రాష్ట్రంలో టీడీపీ నామరూపాల్లేకుండా పోయే పరిస్థితి రావడంతో, తెరపైకి అచ్చెన్నాయుడి పేరుని తీసుకొచ్చారు చంద్రబాబు. ‘ఆలస్యం.. అమృతం.. విషం..’ అని పెద్దలు ఊరికే అన్నారా.? అయినాగానీ, చంద్రబాబుకి అవేమీ పట్టవు. అప్పటినుంచీ అలా సాగదీస్తూ సాగదీస్తూ వచ్చారు.

ఇప్పటికీ ఆ సాగతీత అలాగే కొనసాగుతోంది. నిజానికి, అచ్చెన్న ఈ బాధ్యతను తీసుకోవడానికి సుముఖంగా లేరన్న వాదనలూ లేకపోలేదు. మరోపక్క, అచ్చెన్నకు ఆ పోస్ట్‌ ఇవ్వడం నారా లోకేష్‌కి నచ్చడంలేదన్న ప్రచారమూ లేకపోలేదు. ‘అబ్బే, అదేం లేదు.. అచ్చెన్న ఏపీ టీడీపీ అధ్యక్షుడిగా బాధ్యతలు స్వీకరించడం తథ్యం..’ అని చెబుతోంది టీడీపీ. అచ్చెన్న విషయంలో అంత క్లారిటీతో వున్నప్పుడు, చంద్రబాబు ఎందుకు అచ్చెన్న పేరు ప్రకటించడంలో మీనమేషాల్లెక్కెడుతున్నట్లు.? పేరుకే ఏపీ అధ్యక్షుడు.. పెత్తనమంతా చంద్రబాబు, ఆయన తనయుడు నారా లోకేష్‌దే.

ఇందులో ఎవరికీ ఎలాంటి సందేహాల్లేవు. టీడీపీ జాతీయ పార్టీ అనే భావనలో చంద్రబాబు వున్నారు గనుక.. ఏపీ టీడీపీ, తెలంగాణ టీడీపీ అని చెబుతున్నారు. తెలంగాణలో పార్టీకి అంత సీన్‌ లేదని చంద్రబాబుకి తెలుసు గనుక.. నారా లోకేష్‌కి, తెలంగాణ బాధ్యతల్ని అప్పగించలేదు. ఏపీలోనూ అదే పరిస్థితి. చంద్రబాబు, ఆయన తనయుడు.. ఇద్దరూ జాతీయ నాయకులే. చంద్రబాబు టీడీపీ జాతీయ అధ్యక్షుడైతే, నారా లోకేష్‌ జాతీయ ప్రధాన కార్యదర్శి.

ఇలాంటి పరిస్థితుల్లో అచ్చెన్న కాదు కదా, ఎవరొచ్చినా పార్టీకి అదంగా ఒనగూడే లబ్ది ఏమీ వుండదు. ఏదో అచ్చెన్నను అలా తృప్తి పర్చాలనో, అచ్చెన్న పేరుతో పొలిటికల్‌ స్టంట్‌ చేయాలనో.. టీడీపీ అధినేత చంద్రబాబు ఈ ప్రయత్నం చేస్తున్నారంతే. ఇక, చంద్రబాబు చేస్తున్న ‘ఆలస్యం’తో అచ్చెన్నాయుడిలో ఏదన్నా ఓ మూల చిన్న ‘ఆసక్తి’ వుంటే, అది కూడా పోతుంది.. పార్టీ ఏపీ అధ్యక్ష పదవి విషయంలో.