21 రోజుల లాక్ డౌన్ చాలదట!

కరోనా వైరస్ మహమ్మారిని ఎదుర్కొనేందుకు దేశంలో 21 రోజుల లాక్ డౌన్ విధించిన సంగతి తెలిసిందే. వైరస్ వ్యాప్తిని అరికట్టే ఉద్దేశంతో కేంద్ర ప్రభుత్వం ఈ మేరకు నిర్ణయం తీసుకుంది. ఏప్రిల్ 14తో లాక్ డౌన్ ముగిసినా.. మళ్లీ దానిని పొడిగించే అవకాశం ఉందంటూ జరిగిన ప్రచారాన్ని కేంద్రం తోసిపుచ్చింది. ప్రస్తుతానికి లాక్ డౌన్ పొడిగించే అవకాశం లేదని పేర్కొంది.

అయితే, భారత్ వంటి పెద్ద దేశంలో ప్రస్తుతం కరోనా కేసులు పెరుగుతున్న నేపథ్యంలో 21 రోజుల లాక్ డౌన్ సరిపోదని కేంబ్రిడ్జ్ యూనివర్సిటీకి చెందిన పరిశోధకులు తేల్చిచెప్పారు. ఐదు రోజుల సడలింపులతో మూడు లాక్ డౌన్లు అవసరమని పేర్కొన్నారు. వర్సిటీలోని అప్లైడ్ మేథమేటిక్స్ అండ్ థియరేటికల్ ఫిజిక్స్ విభాగానికి చెందిన భారత సంతతి పరిశోధకులు రాజేశ్ సింగ్, ఆర్.అధికారి దీనిపై విస్తృత పరిశోధనలు చేసి ఈ మేరకు నిర్ధారణకు వచ్చారు.

కేసులు తగ్గించడమే కాకుండా వైరస్ తిరిగి రాకుండా చూడాలంటే ఈ మేరకు మూడు లాక్ డౌన్స్ విధించాల్సి ఉంటుందని స్పష్టంచేశారు. ప్రస్తుతం అమలవుతున్న 21 రోజుల లాక్ డౌన్ ముగిసిన తర్వాత ఐదు రోజుల సడలింపు ఇవ్వాలని అనంతరం 28 రోజుల లాక్ డౌన్ విధించాలని సూచించారు. అది ముగిసిన తర్వాత మరో ఐదు రోజుల సడలింపు ఇచ్చి 18 రోజులు లాక్ డౌన్ పాటించాలన్నారు.

ప్రస్తుత లాక్ డౌన్ వైరస్ వ్యాప్తిని గణనీయంగా తగ్గించినా.. మళ్లీ వ్యాప్తి చెందకుండా ఉండేందుకు, కేసుల సంఖ్యను తగ్గించేందుకు పెద్దగా పని చేయదని వారు అభిప్రాయపడ్డారు. 21 రోజుల నుంచి 49 రోజులకు లాక్ డౌన్ పొడిగించడం వల్ల మరణాల రేటు గణనీయంగా తగ్గుతుందని తమ అధ్యయనంలో తేలినట్టు చెప్పారు. చివరి లాక్ డౌన్ ముగిసే సరికి పాజిటివ్ కేసులు 10 కంటే తక్కువగా నమోదవుతాయని వివరించారు. ఈ లెక్కన చూస్తే చివరి లాక్ డౌన్ జూన్ 10వ తేదీతో ముగుస్తుంది.

ఒకవేళ ఈ పరిశోధకులు చెప్పిన విషయం నిజమైతే.. జూన్ వరకు లాక్ డౌన్ తప్పదేమో.