డోనేషన్స్ విషయంలో హీరోయిన్స్ పై ఫైర్ అయిన బ్రహ్మాజీ

కరోనా వైరస్ కారణంగా షూటింగ్ లు అన్నీ రద్దైన విషయం తెల్సిందే. ప్రీ ప్రొడక్షన్, పోస్ట్ ప్రొడక్షన్ అణా తేడా లేకుండా సినిమాలకు సంబంధించి అన్ని పనులు బంద్ అయ్యాయి. ఈ నేపథ్యంలో రోజూవారి వేతనాలు తీసుకునే వారికి ఇది చాలా ఇబ్బందికర పరిణామంగా మారింది. దీంతో ఇండస్ట్రీ పెద్దన్న చిరంజీవి మరికొంత మంది సహాయంతో ఏర్పాటు చేసినదే కరోనా క్రైసిస్ చారిటీ (సిసిసి).

దీనికి స్టార్లందరి నుండి విశేష స్పందన లభించింది. ప్రభాస్ 50 లక్షలు, మహేష్ బాబు 25 లక్షలు, అల్లు అర్జున్ 20 లక్షలు ఇలా ప్రతి స్టార్ హీరో ముందుకొచ్చి తమకు తోచిన సహాయం చేసారు, చేస్తున్నారు. సీనియర్ నటుడు బ్రహ్మాజీ ఈ చారిటీకి 75,000 విరాళం ప్రకటించారు. ఆయన కొడుకు సంజయ్ రావు సైతం 25,000 సహాయం చేసారు.

అయితే హీరోయిన్లలో లావణ్య త్రిపాఠి వంటి ఒకరిద్దరు తప్పితే మిగతా హీరోయిన్లు ఎవరూ నయాపైసా చారిటీకి సహాయం ప్రకటించలేదు. దీనిపై బ్రహ్మాజీ గుస్సా అయ్యారు. ముంబై నుండి వచ్చినా ఇక్కడ స్టార్ డం సంపాదించుకునే స్టార్ హీరోయిన్లు కోట్లలో పారితోషికాలు తీసుకుంటారు. అలాంటిది వారు లక్షల్లో కాదు కనీసం వేలల్లో అయినా చారిటీ కి తమవంతు సహాయం ప్రకటించాల్సింది అంటూ తన అసహనాన్ని వ్యక్తపరిచారు.

ఇలాంటి కష్ట సమయంలో ఎంత ఇచ్చారు అని ఎవరూ అడగరు. కనీసం మనవంతుగా ఎంతో కొంత సహాయం చేయడం మానవత్వానికి ప్రతీకగా నిలుస్తుంది.