బుగ్గన ఢిల్లీ టూర్‌: కేంద్రం, ఏపీపై కరుణ చూపిస్తుందా.?

ఆంధ్రప్రదేశ్‌ రాష్ట్ర ఆర్థిక మంత్రి బుగ్గన రాజేంద్రనాథ్‌ ఢిల్లీకి వెళ్ళారు. పలువురు కేంద్ర మంత్రులతో సమావేశమయ్యారు. మరీ ముఖ్యంగా కేంద్ర ఆర్థిక మంత్రి నిర్మలా సీతారామన్‌ని కలిసిన బుగ్గన అండ్‌ టీవ్‌ు, రాష్ట్ర ఆర్థిక పరిస్థితిని కేంద్ర మంత్రికి వివరించారు. కరోనా కష్ట కాలం నేపథ్యంలో ఆర్థికంగా ఇబ్బందులున్నాయనీ, రాష్ట్రానికి రావాల్సిన నిధుల్ని సకాలంలో విడుదల చేయాలని కేంద్ర ఆర్థిక మంత్రిని బుగ్గన అండ్‌ టీమ్ కోరింది. పోలవరం ప్రాజెక్టు సహా పలు అంశాల్ని కేంద్రం దృష్టికి ఈ సందర్భంగా బుగ్గన బృందం తీసుకెళ్ళిందట.

కేంద్రం – రాష్ట్రాల మధ్య సన్నిహిత సంబంధాలు వుండాల్సిందే. రాజకీయాలెలా వున్నా, కేంద్రం – రాష్ట్రాలు కలిసి పనిచేస్తేనే.. అటు దేశం, ఇటు రాష్ట్రాలూ అభివృద్ధి పథంలో దూసుకెళ్తాయి. అయితే, ప్రస్తుతం ఆంధ్రప్రదేశ్‌లో భిన్న రాజకీయ పరిస్థితులున్నాయి. ఇటీవల కేంద్ర ఆర్థిక మంత్రి నిర్మలా సీతారామన్‌, ఆంధ్రప్రదేశ్‌ ప్రభుత్వంపై విమర్శలు చేశారు. కేంద్రం తక్కువ ధరకు విద్యుత్‌ ఇస్తోంటే, రాష్ట్ర ప్రభుత్వం పేదలపై విద్యుత్‌ ఛార్జీల భారం మోపుతోందని ఆరోపించారు. దానికి కౌంటర్‌గా పలువురు వైసీపీ నేతలు ఘాటైన రీతిలో ఎదురుదాడికి దిగారు. సోషల్‌ మీడియాలో అయితే, మహిళ అనీ చూడకుండా కేంద్ర మంత్రి నిర్మలా సీతారామన్‌పై జుగుప్సాకరమైన వ్యాఖ్యలు చేశారు వైసీపీ మద్దతుదారులు. ఈ వ్యవహారంపై ఏపీ బీజేపీ నేతలు చాలా సీరియస్‌ అయ్యారు కూడా.

సరే, రాజకీయ విమర్శల సంగతి పక్కన పెడితే.. బుగ్గన, కేంద్ర మంత్రి నిర్మలా సీతారామన్‌తో సమావేశం సందర్భంగా ‘కరెంటు ఛార్జీల’ అంశాన్ని ప్రస్తావించారా.? లేదా.? అన్న చర్చ సర్వత్రా జరుగుతోంది. మరోపక్క, పోలవరం ప్రాజెక్టు పనుల్లో అవినీతి జరిగిందంటూ వైఎస్‌ జగన్‌ ప్రభుత్వం, గత చంద్రబాబు ప్రభుత్వంపై ఆరోపణలు చేస్తే, ‘అలాంటిదేమీ లేదు’ అని కేంద్రం ఇటీవల తేల్చి చెప్పింది. ఈ నేపథ్యంలో.. కేంద్ర మంత్రుల వద్ద ఈ అంశాలు చర్చకు వచ్చాయా.? అన్న ప్రశ్నలు సహజంగానే ఉత్పన్నమవుతాయి.

ఏదిఏమైనా, రాష్ట్రాన్ని ఈ క్లిష్ట పరిస్థితుల్లో కేంద్రం ఆదుకోవాల్సి వుంది. రాజకీయ విమర్శలు పక్కన పెట్టి ఇటు రాష్ట్రం, కేంద్రంతో సత్సంబంధాలు కొనసాగిస్తూ.. రాష్ట్రానికి అవసరమైన నిధులు తీసుకురావాలనే ఆశిద్దాం.