బంగ్లాదేశ్ లో పడవ ప్రమాదం.. 26 మంది మృతి

బంగ్లాదేశ్ లో ఘోర పడవ ప్రమాదం చోటుచేసుకుంది. పద్మానదిలో వేగంగా వెళ్తున్న బోటు తిరగబడటంతో 26 మంది మరణించారు. మరో ఐదుగురు సురక్షితంగా బయటపడ్డారు. మదారిపూర్ జిల్లాలో ఈ ఘటన చోటుచేసుకుంది. ఇసుకను తీసుకెళ్లే కార్గో పడవలో ప్రయాణికులను తీసుకెళ్తుండగా మరో బోటును ఢీకొట్టడంతో ప్రమాదం జరిగింది. ఘటన జరిగిన సమయంలో అనుభవం లేని బాలుడు పడవ నడుపుతున్నాడని.. అతడు అత్యంత వేగంగా నిర్లక్ష్యంగా నడపడంతోనే ప్రమాదం జరిగిందని పోలీసులు వెల్లడించారు. బుధవారం వరకు కోవిడ్ ఆంక్షలు అమల్లో ఉన్నాయని.. అయినప్పటికీ వాటిని పాటించకుండా ఒకే పడవలో 30 మందిని ఎక్కించారని చెప్పారు. ఈ ఘటనలో 26 మంది చనిపోయారని.. అందరి మృతదేహాలను వెలికి తీసినట్టు చెప్పారు. ఘటనపై విచారణ జరపడానికి ఆరుగురు సభ్యులతో ప్రభుత్వం ఓ కమిటీ ఏర్పాటుచేసింది.