మహా డ్రామా.. తెలుగు రాష్ట్రాలపై బీజేపీలో డైలమా

కేంద్రంలో వరుసగా రెండోసారి అధికారం చేపట్టి దూకుడైన నిర్ణయాలతో దూసుకుపోతున్న బీజేపీకి మహారాష్ట్రలో ఝలక్ తగిలింది. బలమున్నా, లేకున్నా రాష్ట్రాల్లో కాషాయ జెండా రెపరెపలాడించడమే లక్ష్యంగా ముందుకెళ్తున్న కమలనాథుల దూకుడుకు బ్రేక్ పడింది. ఈ పరిణామం కాషాయదళానికి ఇబ్బందిగా మారగా.. పలు ప్రాంతీయ పార్టీలకు మాత్రం ఎనలేని ఉత్సహాన్నిచ్చింది.

ముఖ్యంగా తెలుగు రాష్ట్రాల సీఎంలకు మహారాష్ట్ర పరిణామాలు సానుకూలంగా మారాయి. ఉత్తరాదిలో మాత్రమే పట్టున్న బీజేపీ.. దక్షిణాదిన కర్ణాటక దాటి కూడా విస్తరించాలని ప్రణాళికలు రచిస్తున్న సంగతి తెలిసిందే. ముఖ్యంగా తెలుగు రాష్ట్రాలపై పట్టు సాధించాలని ఉవ్విళ్లూరుతోంది. ఇందుకు సంబంధించి తెర వెనుక గట్టిగానే వ్యూహాలు పన్నుతోంది. ఇతర పార్టీ నేతలను చేర్చుకోవడం ద్వారా బలపడాలని భావిస్తూ ఆ దిశగా ముందుకెళ్తోంది.

తెలంగాణలో నాలుగు ఎంపీ స్థానాలు గెలుచుకోవడంతో ఇక్కడ టీఆర్ఎస్ కు ప్రత్యామ్నాయంగా ఎదగాలని యోచిస్తోంది. ఇందుకు అధికార పార్టీని ఇబ్బంది పెట్టి రాష్ట్రంలో పాగా వేయాలన్నది ఆ పార్టీ ప్రణాళికగా చెబుతున్నారు. మహారాష్ట్రలో ఫడ్నవిస్ సీఎంగా ప్రమాణ స్వీకారం చేసిన రోజున బీజేపీ తెలంగాణ అధ్యక్షుడు లక్ష్మణ్ స్పందిస్తూ.. రాష్ట్రంలోనూ అలాంటి పొలిటికల్ సర్జికల్ స్ట్రైక్స్ ఉంటాయని వ్యాఖ్యానించడమే అందుకు నిదర్శనమని పేర్కొంటున్నారు.

ఇక ఏపీలో ఆ రాష్ట్ర సీఎం వైఎస్ జగన్ మోహన్ రెడ్డిపై ఉన్న కేసులను అడ్డం పెట్టుకుని లాభపడాలన్నది బీజేపీ యోచన అని తెలుస్తోంది. జగన్ బెయిల్ రద్దు చేసి ఆయన్ను జైలుకు పంపడం ద్వారా పార్టీని కకావికలు చేసి, ఆ స్థానంలోకి తాము వెళ్లాలన్నది కమలనాధుల కుయుక్తులు అని ప్రచారం సాగుతోంది. ఈ క్రమంలో మహారాష్ట్రలో దెబ్బతిన్న బీజేపీ తెలుగు రాష్ట్రాలపై కాస్త వేచి చూసే ధోరణి అవలంభించాలని భావించే అవకాశం ఉందని విశ్లేషణలు వినిపిస్తున్నాయి.

మహారాష్ట్ర రాజకీయ క్రీడలో పరువు పోగొట్టుకున్న నేపథ్యంలో తెలుగు రాష్ట్రాలపై ప్రస్తుతం ఎలాంటి దుందుడుకు చర్యలకు పాల్పడకపోవచ్చని చెబుతున్నారు. ఒకవేళ కాదని మొండిగా ముందుకెళితే బీజేపీపై జనంలో వ్యతిరేకత ప్రబలే అవకాశం ఎక్కువగా ఉంటుందని రాజకీయ పండితులు అభిప్రాయపడుతున్నారు. దీంతో బీజేపీ నుంచి తెలుగు రాష్ట్రాల అధినేతలకు ప్రస్తుతానికి ముప్పు తప్పినట్టే అనిపిస్తోంది.