పరువుపోతున్నా.. రాజకీయం కోసమే పాకులాట…

రాజకీయాల్లో ఎప్పుడు ఎలా మారుతుందో ఎవరికీ తెలియడం లేదు. కొన్ని విషయాల్లో అన్ని పార్టీలు తమ గొడవలను పక్కన పెట్టి రాష్ట్రం కోసం, రాష్ట్ర భవిష్యత్తు కోసం కలిసి పనిచేయాల్సిన వాటిల్లో కూడా గొడవకు దిగుతూ.. రచ్చ చేస్తున్నారు. చివరకు పరువు పోగొట్టుకొని తలలు పట్టుకోవాల్సిన పరిస్థితి తెచ్చుకుంటున్నారు. ఆంధ్రుల రాజధాని విషయంలో ఇప్పుడు ఇదే జరుగుతున్నది.

మా హయాంలో రాలేదు కాబట్టి దీని గురించి మాకు అనవసరం అనే రీతిగా వైకాపా ప్రవర్తిస్తోంది. వైకాపా అధికారంలోకి వచ్చినప్పటి నుంచి అమరావతి విషయాన్ని అసలు పట్టించుకోలేదు. రాజధానితో ఇప్పుడు పనేముంది. ఎప్పుడైనా కట్టుకోవచ్చు.. తొందరలేదు అన్నట్టుగా మాట్లాడింది.

రాజధాని అమరావతిని తెలుగుదేశం పార్టీ ప్రకటించింది. కాబట్టి దానిని వ్యతిరేకించడమే తమ డ్యూటీ అనుకున్నారు. అమరావతి ప్రారంభోత్సవం సమయంలో ప్రతిపక్షంలో ఉన్న వైకాపా హాజరు కాకపోవడం దీనికి ఉదాహరణ. అమరావతిపై వైకాపా ఎలాంటి స్టాండ్ లో ఉన్నారో అప్పుడే అర్ధం చేసుకొని ఉండాల్సింది.

అధికారంలోకి వచ్చిన తరువాత కూడా వైకాపా దాని గురించి పట్టించుకోలేదు. పైగా అమరావతిలో నిర్మాణాలను ఆపాలని చెప్పడంతో గొడవ మొదలైంది. అమరావతి రాజధాని అని కేంద్రం కూడా గతంలో ఒప్పుకున్నది. దానికోసం నిధులు కూడా కేటాయించింది. నిధులు కేటాయించి స్మార్ట్ సిటీస్ మిషన్ లో భాగంగా కొంతమేర నిధులు ఇచ్చినప్పుడు కేంద్రం ఊరుకుంటుందా..అందుకే అమరావతిని ఆంధ్రప్రదేశ్ రాజధానిగా గుర్తిస్తూ మ్యాప్ రిలీజ్ చేసిందని.

ఆంధ్రప్రదేశ్ లో ఉన్న రాజధాని పంచాయితిని మీడియాలో ఫోకస్ చేసి ఢిల్లీదాక తీసుకెళ్లి మన పరువును మనమే తీసుకున్నాం. ఈరోజు జాతీయ మీడియా సాక్షిగా అమరావతిలో రగడ చేసి మరోసారి పరువు పోగొట్టుకున్నాం. ఇలానే జరుగుతుంటే.. అమరావతిలో అభివృద్ధి ఒక్క అడుగు కూడా ముందుకు పడదు అనడంలో సందేహం అవసరం లేదు.