రుణాల రద్దు: పెద్దలకో తీరు.. పేదలకో తీరు

మన సమాజంలో ఏ విషయమైనా డబ్బున్నవాళ్లకి ఒకలా.. డబ్బు లేని వాళ్లకు మరోలా జరుగుతాయనడంలో ఎవరికీ ఎలాంటి సందేహం ఉండదు. దేవుడి దర్శనం దగ్గర నుంచి ప్రభుత్వం ప్రాపకం వరకు అన్నీ పెద్దలకు ఒకలా, పేదలకు మరోలా జరుగుతాయి. సాధారణ ప్రజల రుణాలను ముక్కు పిండి మరీ వసూలు చేసే బ్యాంకులు.. పెద్దల విషయానికి వచ్చేసరికి మాత్రం ఉదారంగా వ్యవహరిస్తాయి. వేల కోట్ల రుణాలను సింపుల్ గా రద్దు చేసేస్తాయి. ఇందుకు ప్రభుత్వాలు కూడా వత్తాసు పలుకుతాయి. అదే చిల్లిగవ్వ లేని పేదల రుణాలు రద్దు చేయాలంటే బోలెడన్ని నిబంధనలు గుర్తుకు వస్తాయి.

రైతులకు ప్రభుత్వం నుంచి ఏవైనా డబ్బులు వస్తే వాటిని బ్యాంకులు తమ అప్పు కింద మినహాయించుకుంటాయి. అదే పెద్దల విషయంలో మాత్రం అలాంటి సాహసం చేయవు. తాజాగా 50 మంది రుణ ఎగవేతదారులకు సంబంధించి రూ.68వేల కోట్లను బ్యాంకులు రద్దు చేశాయి. సాంకేతికంగా రైటాఫ్ అని చెప్పినప్పటికీ, ఇక ఆ రుణాలు వచ్చే అవకాశం ఉండదనేది దాని అర్థం.

ఇలా రుణాలు రైటాఫ్ అయినవారిలో నీరవ్ మోడీ కేసుతో సంబంధం ఉన్న మోహిల్ చోక్సీకి చెందిన మూడు కంపెనీలు కూడా ఉన్నాయి. వీటికి సంబంధించి మొత్తం రూ.8వేల కోట్లు ఉన్నాయి. అలాగే రామ్ దేవ్ బాబాకు చెందిన రుచి సోయా ఇండస్ట్రీస్ కు రూ.2,212 కోట్లు కూడా రైటాఫ్ అయ్యాయి.

ఇక విజయ్ మాల్యాకు చెందిన కింగ్ ఫిషర్ ఎయిర్ లైన్స్ కు రూ.1943 కోట్లు రద్దయ్యాయి. ఇక మన తెలుగు రాష్ట్రాలకు చెందిన పెద్దలూ ఉన్నారు. డెక్కన్ క్రానికల్ అధినేత వెంకట్రామిరెడ్డి తీసుకున్న రూ.1915 కోట్లు, మాజీ ఎంపీ రాయపాటి సాంబశివరావు కంపెనీ ట్రాన్స్ స్టాయ్ తీసుకున్న రూ.1790 కోట్లు, జగన్ కేసులో నిందితుడిగా ఉన్న శ్యామ్ ప్రసాద్ రెడ్డి ఇందూ ప్రాజెక్ట్స్ కంపెనీ ద్వారా తీసుకున్న రూ.835 కోట్లు కూడా రైటాఫ్ అయిన రుణాల్లో ఉన్నాయి.

ప్రస్తుతం రుణాలు రద్దు అయినవారిలో దాదాపు అందరూ కూడా ఇప్పటికీ ఏటా వందలు, వేల కోట్లలో ఆదాయం సంపాదిస్తున్నవారే. అయినా.. వారి రుణాలు రద్దయ్యాయి. పైగా మళ్లీ బ్యాంకులు అలాంటివారికే రుణాలు ఎడాపెడా ఇస్తాయి. ఈ పరిస్థితి ఎప్పటికి మారుతుందో?