Pawan Kalyan: ఆంధ్రప్రదేశ్ రాజకీయాల్లో ముందు ముందు ఏం జరగబోతోంది.? అంటే, దానిపై రకరకాల చర్చోపచర్చలు జరుగుతున్నాయి. జనసేన – టీడీపీ పొత్తు ఖాయమన్న వాదనలు ఓ వైపు, దానికి సంబంధించి ‘కండిషన్స్’ ఇంకో వైపు కనిపిస్తున్నాయి. ‘వైసీపీ కోరుకుంటున్నది జరగదు’ అని జనసేనాని చెబుతున్నారు.
పైగా, ‘వైసీపీ వ్యతిరేక ఓటు చీలనివ్వను’ అని పవన్ కళ్యాణ్ కుండబద్దలుగొట్టేస్తున్నారు. ‘నేను ముఖ్యమంత్రిని అయితే మీ సేవకుడిలా పని చేస్తాను. జనసేన పార్టీకి ఒక్క అవకాశం ఇవ్వండి’ అంటూ పవన్ కళ్యాణ్ నినదిస్తోంటే, టీడీపీకి సహకరించడం తప్ప జనసేనకు ఇంకో ఆప్షన్ లేదని టీడీపీ వర్గాలంటున్నాయి.
కేవలం జనసేనకు 20 సీట్లను మాత్రమే కేటాయిస్తామనీ, పవర్ షేరింగ్ ఛాన్సే లేదని టీడీపీ తరఫునుంచి లీకుల రూపంలో వ్యవహారం బయటకు వస్తోంది. ఇదే విషయాన్ని టీడీపీ అనుకూల మీడియా స్పెషల్గా ఫోకస్ చేస్తోంది. మరోపక్క, టీడీపీకి జనసేన అమ్ముడైపోయిందని వైసీపీ ఆరోపిస్తున్న సంగతి తెలిసిందే.
ఈ క్రమంలో జనసేనకే ముఖ్యమంత్రి పదవి ఇచ్చేలా వుంటేనే టీడీపీతో పొత్తు పెట్టుకోవాలని జనసైనికులు తమ అధినాయకత్వాన్ని డిమాండ్ చేస్తున్నారు. కాపు సామాజిక వర్గం నుంచి కూడా జనసేన మీద ఇదే ఒత్తిడి తీసుకొస్తోంది. లేదూ, జనసేనాని బేషరతుగా టీడీపీకి గనుక మద్దతు ఇస్తే, జనసేన వెంట కాపు సామాజిక వర్గం ఎంతవరకు నిలబడుతుందన్నది చెప్పడం కష్టమే. జనసైనికుల్లోనూ నిరాశా నిస్పృహలు ఆవహించే అవకాశం లేకపోలేదు.
2014లో టీడీపీకి మద్దతిచ్చాం.. ఇప్పుడు టీడీపీనే మాకు మద్దతివ్వాలి.. అన్నది జనసేన వాదనగా కనిపిస్తోంది. దానికి సంబంధించి జనసేనాని నుంచి సాధారణ సంకేతాలు మినహాయిస్తే, గట్టి ప్రకటన అయితే రావడంలేదు. రాజకీయాల్లో ఏదైనా జరగొచ్చు. గ్రాడ్యుయేట్ ఎమ్మెల్సీ ఎన్నికలతోనే తమ బలం పెరిగిపోయిందని టీడీపీ అధినాయకత్వం ఫిక్సయిపోవడమంటే అంతకన్నా హాస్యాస్పదం ఇంకోటుండదు.
కింది స్థాయిలో టీడీపీ – జనసేన కార్యకర్తలు కలిసి పని చేయాలంటే, పవర్ షేరింగ్ తప్ప ఇంకో ఆప్షన్ లేదు. అది లేకుండా రెండు పార్టీల మధ్య పొత్తు వుంటే, వైసీపీ చేసే దుష్ప్రచారానికి.. రెండు పార్టీలూ దెబ్బతినే అవకాశముంటుంది.
ఇక్కడ మరో కీలకమైన అంశమేంటంటే, ‘అధికారం దక్కినా, దక్కకపోయినా.. ఇంకోసారి తాను సైతం ఓడిపోయినా వ్యక్తిగతంగా తనకేమీ నష్టం లేదు’ అని జనసేన అధినేత పవన్ కళ్యాణ్ చెబుతున్నారు. పైగా, ఇంకాస్త బలంగా పోరాడుతానని అంటున్నారాయన. ఏ రకంగా చూసినా పవన్ కళ్యాణ్కి 2024 ఎన్నికలు జీవన్మరణ సమస్య కాదు.
కానీ, టీడీపీ అధినేత చంద్రబాబు పరిస్థితి వేరు. ఆ పార్టీ పరిస్థితి వేరు. ముమ్మాటికీ టీడీపీకి 2024 ఎన్నికలు జీవన్మరణ సమస్యే. వృద్ధాప్య సమస్యల నేపథ్యంలో చంద్రబాబుకీ రాజకీయంగా జీవన్మరణ సమస్యే కదా.! అలాంటప్పుడు, పవర్ షేరింగ్ తప్ప తెలుగుదేశం పార్టీకి ఇంకో ఆప్షన్ లేదు జనసేనతో పొత్తు విషయమై.
2019 ఎన్నికల్లో ఒకే ఒక్క సీటు గెలిచిన జనసేన, 2024 ఎన్నికల్లో ఒంటరిగా పోటీ చేస్తే, ఎట్టి పరిస్థితుల్లోనూ డబుల్ డిజిట్ అయితే కొల్లగొడుతుంది. అది జనసేనకి లాభమే. పవర్ షేరింగ్ అనేది జనసేనకు జస్ట్ బోనస్ అవుతుందంతే. ఈ నేపథ్యంలో టీడీపీకి, జనసేనకు కేటాయించే సీట్లలో ‘రేషనింగ్’ అనే చాన్సే లేదన్నమాట. పవర్ షేరింగ్ విషయంలో కూడా అంతే.! బేషరతు మద్దతు జనసేన నుంచి ఆశించే పరిస్థితే లేదు టీడీపీకి.
930554 213022Appreciate it for helping out, superb data. 70328