ఉచిత విద్యుత్‌కి ‘మంగళం’ పాడేసిన ఆంధ్రప్రదేశ్‌.?

వైఎస్‌ రాజశేఖర్‌రెడ్డి హయాంలో అత్యంత ప్రతిష్టాత్మకంగా ప్రారంభమైన ‘ఉచిత విద్యుత్‌’ పథకానికి కాలం చెల్లుతోంది. అదీ వైఎస్‌ రాజశేఖర్‌రెడ్డి తనయుడు వైఎస్‌ జగన్‌ మోహన్‌రెడ్డి హయాంలో కానుండడం గమనార్హం. వ్యవసాయానికి ఉచిత విద్యుత్‌ అందించడం ద్వారా రైతుల్ని ఉద్ధరించాలన్నది అప్పట్లో వైఎస్‌ రాజశేఖర్‌రెడ్డి సంకల్పం. దాన్ని, ఆ తర్వాతి ప్రభుత్వాలూ కొనసాగించాయి. దేశంలో చాలా రాష్ట్రాలు ‘రైతులకు ఉచిత విద్యుత్‌’ పథకాన్ని అమల్లోకి తెచ్చాయి. నిజానికి ఇదొక ‘ఓటు బ్యాంకు రాజకీయం’ అనే విమర్శ చాలా కాలంగా విన్పిస్తూనే వుంది.

ఆ సంగతి పక్కన పెడితే, ఉచిత విద్యుత్‌ పథకానికి మంగళం పాడేస్తూ, ‘నగదు బదిలీ’ పథకాన్ని తెరపైకి తెచ్చింది వైఎస్‌ జగన్‌ సర్కార్‌. విద్యుత్‌ రంగంలో సంస్కరణలంటూ కేంద్రం, ఇటీవల రాష్ట్రాలకు కొన్ని సూచనలు చేసిన విషయం విదితమే. ఈ సూచనలపై పలు రాష్ట్రాలు అభ్యంతరం వ్యక్తం చేశాయి కూడా. ‘వెంటనే ఉచిత విద్యుత్‌కి మంగళం పాడేయాలని’ కేంద్రం, రాష్ట్రాలకు సూచించింది.

దానికి అనుగుణంగా వైఎస్‌ జగన్‌ సర్కార్‌, ఉచిత విద్యుత్‌ పథకానికి మంగళం పాడేసి, ఆ స్థానంలో నగదు బదిలీ పథకాన్ని తీసుకొచ్చింది. ఈ పథకం ద్వారా, రైతుల ఖాతాల్లోకి ప్రభుత్వం డబ్బులు పంపుతుంది. ఏ రైతు ఎంత కరెంట్‌ వాడుతున్నారో గుర్తించి, దానికి సరిపడా సొమ్ముల్ని ప్రభుత్వం, రైతుల ఖతాల్లో వేయడం జరుగుతుందనీ, ఆ డబ్బుల్ని రైతులు విద్యుత్‌ పంపిణీ సంస్థలకు చెల్లించాలని పేర్కొంటూ ఓ జీవో విడుదల చేసింది రాష్ట్ర ప్రభుత్వం.

ఈ సంస్కరణల్లో భాగంగా కొత్త మీటర్లనూ అమర్చుతారట. వాటికి అయ్యే ఖర్చుని కూడా సబ్సిడీ రూపంలో రైతుల ఖాతాల్లోకి వేస్తారట. గ్రౌండ్‌ లెవల్‌లో రైతులకు ఏమైనా సమస్యలుంటే, పరిష్కారం కోసం కూడా ఓ యంత్రాంగాన్ని పకడ్బందీగా ఏర్పాటు చేస్తారట. కాన్సెప్ట్‌ అదిరింది కదూ.!

ప్రభుత్వాలు మారినప్పుడల్లా రాజధానులే మారిపోయే పరిస్థితి వచ్చింది. అలాంటిది, నగదు బదిలీ పథకాల్లో మార్పులు రాకుండా వుంటాయా.? అఫ్‌కోర్స్‌ ఉచిత విద్యుత్‌ పథకం కూడా అలాంటిదేననుకోండి.. అది వేరే విషయం. కానీ, విద్యుత్‌ పంపిణీ సంస్థలు వేసే బిల్లులు.. వాటిల్లో మ్యాజిక్కుల గురించి గత కొన్నాళ్ళుగా చూస్తూనే వున్నాం.

రైతుల్లో చాలామంది నిరక్షరాస్యులే వుంటారు. మరి, వారికి ఎదురయ్యే ఇబ్బందుల మాటేమిటి.? ప్రభుత్వం ఎంతలా పరిష్కారాలు చూపుతామని చెబుతున్నప్పటికీ.. ఉచిత విద్యుత్‌ స్థానంలో వచ్చే నగదు బదిలీ పథకం.. రైతుకి ఏమాత్రం న్యాయం చేయదని రాజకీయ పరిశీలకులు అభిప్రాయపడుతున్నారు.