ఇన్‌సైడ్‌ స్టోరీ: ఉద్దానోద్ధారకులు ఎవరు.?

ఉద్దానం.. శ్రీకాకుళం జిల్లాలో ఓ ప్రాంతం. కొబ్బరి తోటలకు నెలవు. కోనసీమలా.. కేరళలా.. ఉద్దానం ఒకప్పుడు కొబ్బరికి కేరాఫ్‌ అడ్రస్‌. కానీ, ఇప్పుడు ఉద్దానం అంటే, కిడ్నీ వ్యాధులకు కేరాఫ్‌ అడ్రస్‌. ప్రభుత్వాలు మారుతున్నాయి.. ఉద్ధానం పేరుతో ప్రతి ఒక్కరూ పబ్లిసిటీ స్టంట్లు చేసేవారే. పెన్షన్లంటారు.. ఆర్థిక సాయం అంటారు.. ఆరోగ్యశ్రీ అంటారు.. ఎన్టీఆర్‌ వైద్య సేవ అంటారు.. ఇంకేవేవో చెబుతారు. అసలు సమస్య ఎక్కడుంది.? అన్నది మాత్రం తేల్చరు. ఇదీ పాలకుల చిత్తశుద్ధి.

చంద్రబాబు హయాంలో అయినా, వైఎస్‌ జగన్‌ హయాంలో అయినా జరిగిందీ, జరుగుతున్నదీ కేవలం పబ్లిసిటీ స్టంట్లు మాత్రమే. నిజానికి, ఉద్దానం సమన్య ఈనాటిది కాదు. రెండు మూడు దశాబ్దాలుగా ఉద్దానం ప్రాంతంలో కిడ్నీ సమస్య అక్కడి ప్రజలకు కంటి మీద కునుకు లేకుండా చేస్తోంది. ఎంతోమంది కిడ్నీ సమస్యలతో బాధపడుతున్నారక్కడ.. చాలామంది ప్రాణాలు కోల్పోయారు కూడా. ఎన్నెన్నో పరిశోధనలు జరిగాయి.. కానీ, ఏ పరిశోధన కూడా ఉద్దానం కిడ్నీ సమస్యకు పరిష్కారం ఇప్పటిదాకా కనుగొనలేకపోయాయి.

నిజానికి, ఆ పరిశోధనలకు ప్రభుత్వాల నుంచి అందాల్సిన స్థాయిలో సహాయ సహకారాలు అందలేదు. 2014 తర్వాత ఉద్ధానం ప్రాంతం వార్తల్లో హాట్‌ టాపిక్‌గా మారిందంటే.. దానిక్కారణం జనసేన అధినేత పవన్‌ కళ్యాణ్‌. విదేశాల నుంచి వైద్య నిపుణుల్ని రప్పించి మరీ ఉద్దానంలో పరిశోధనలు చేయంచారు జనసేనాని. ఆ ఎఫెక్ట్‌తోనే అప్పటి చంద్రబాబు సర్కార్‌ అలర్ట్‌ అయ్యింది. ఉద్దానం కిడ్నీ బాధితుల కోసం ప్రత్యేక వైద్య సౌకర్యాలు, మంచి నీటి సౌకర్యం.. అంటూ హడావిడి జరిగింది. ఆ తర్వాత వైఎస్‌ జగన్‌ పాలనలో పెన్షన్లనీ.. ఇంకోటనీ హడావిడి జరుగుతోంది. అంతే తప్ప, ఉద్దానం కిడ్నీ బాధితులకు ఇప్పటికీ ఊరట లభించడంలేదు.

చంద్రబాబుని మించి ఇప్పుడు వైఎస్‌ జగన్‌ సర్కార్‌ పబ్లిసిటీ స్టంట్లు చేస్తోంది. ఉద్దానోద్ధారకుడు వైఎస్‌ జగన్‌ మోహన్‌రెడ్డేనంటూ వైసీపీ శ్రేణులు, వైసీపీ అనుకూల మీడియా భజన షురూ చేసింది. ఉద్ధరించడం అంటే, ఆ ప్రాంతం నుంచి కిడ్నీ సమస్యల్ని దూరం చేయాలి. కానీ, ఇంకా అక్కడ కిడ్నీ వ్యాధులు ప్రబలుతూనే వున్నాయి. ఇదీ ప్రభుత్వాల చిత్తశుద్ధి.